Batysqazaqstandyq palýan respýblıkalyq týrnırdiń jeńimpazy atandy
ORAL. QazAqparat - Shymkent qalasynda qazaq halqynyń dańqty palýany Qajymuqan Muńaıtpasovty eske alýǵa arnalǵan erkin jáne áıelder kúresinen márege jetken respýblıkalyq týrnırde sportqa daryndy balalarǵa arnalǵan mamandandyrylǵan oblystyq mektep ınternatynyń shákirti Aıdana Sultanova 40 kg salmaqta jeńimpaz atandy, dep habarlaıdy «QazAqparat» tilshisi.
BQO dene shynyqtyrý jáne sport basqarmasynan túsken málimetke qaraǵanda, sondaı-aq Arına Asmambetova 60 kg salmaqta qola júldege ıe boldy. Palýandardy baptaǵan Baımurat Ábdirahmanov pen Musabek Naregeev.
Budan buryn A.Sultanova Taıland astanasy Bangkok qalasynda kadetter arasynda ótken áıelder kúresinen Azııa chempıonatynda qola júldeger atanǵan bolatyn. Endi ol qyrkúıek aıynda Grekııa astanasy Afıny qalasynda ótetin álem chempıonatyna qatysady.
Aıta keteıik, osy mekteptiń shákirtteri, buǵan deıin taekvondodan Azııa chempıony atanǵan Lıana Kýshkeeva jáne dzıýdodan qurlyq birinshiliginiń qola júldegeri Erlan Ońalov ta dúnıejúzilik dodaǵa ázirlenýde. 
