Batysqazaqstandyq palýan E.Larıonova Azııa chempıonatynyń qola júldegeri atandy
ORAL. QazAqparat - Batysqazaqstandyq palýan Ekaterına Larıonova Dohada ótip jatqan Azııa chempıonatynda qola júldeger atandy.
Ol 63 keli salmaqta soltústikkoreıalyq qarsylasyn 7:2 esebimen utty.
Aıta keteıik, kishkentaıynan ákesi Alekseı jattyqtyryp kele jatqan E.Larıonova 2011 jyly kadetter arasynda Azııa, álem birinshilikterinde top jarǵan bolatyn. 2013 jyly eresekter sapynda da óner kórsetken Ekaterına Býdapesht qalasynda ótken álem chempıonatynyń qola júldesin jeńip aldy. 2014 jyly jastar arasynda Azııa birinshiliginiń jeńimpazy atanǵan ol bıyl Mınsk qalasynda úsh márte Olımpıada chempıony Aleksandr Medvedtiń júldesi úshin eresekter arasynda halyqaralyq Gran-prı týrnırinde kúmis júldeni enshilegen edi. Ekaterına qyzymyz - Rıo-de-Janeıroda 2016 jyly ótetin Olımpıadaǵa barýdan basty úmitkerlerdiń biri.
