Batysqazaqstandyq órt sóndirýshi «Erligi úshin» medalimen marapattaldy
ORAL. QazAqparat - Batysqazaqstandyq órt sóndirýshi Andreı Sýrko «Erligi úshin» medalimen marapattaldy, dep habarlaıdy QazAqparat tilshisi.
Oblystyq Tótenshe jaǵdaılar departamentiniń baspasóz qyzmetinen túsken málimetke qaraǵanda, QR ІІM TJ komıtetiniń segiz qutqarýshysy men órt sóndirýshisi áskerı jáne qyzmettik mindetterin adal oryndaǵany, zańdylyq pen quqyqtyq tártipti qamtamasyz etý kezinde kórsetken erligi men qaısarlyǵy úshin Qazaqstan Respýblıkasy Prezıdentiniń 2018 jylǵy 27 sáýirdegi № 671 Jarlyǵymen Qazaqstan Respýblıkasynyń memleketik nagradalarymen marapattaldy.
Keshe QR ІІM TJ jónindegi komıtetinde Otan qorǵaýshy kúnine jáne Jeńistiń 73 jyldyǵyna arnalǵan saltanatty jıynda Іshki ister mınıstriniń orynbasary ıÝrıı Ilın tórt órt sóndirýshige memlekettik nagradalaryn tabys etti. Solardyń ishinde BQO TJ departamenti órt sóndirý jáne apattyq-qutqarý jumystary qyzmeti №2 órt sóndirý bóliminiń bólimshe komandıri A.Sýrko bar.
Budan bir jyl buryn, 2017 jyly 5 mamyr kúni Oral qalasyndaǵy 5 qabatty úıde órt boldy. Órt sóndirýshiler kelip jetkende, otqa oranǵan №43 páterde 1936 jylǵy qarııanyń qalǵany belgili boldy. Azamattyq qorǵaý praporşıgi A.Sýrkonyń basshylyǵymen bólimshe 82 jasar zeınetkerdi qaýipsiz jerge alyp shyqty. Barlyǵy 30 adam shyǵarylsa, sonyń ekeýi - 3 jáne 4 jastaǵy balalar. Páter ıelerine kóp shyǵyn keltirilmeı, órt te tez aýyzdyqtaldy.
Sol sekildi 19 shilde kúni Oralda taǵy bir 5 qabatty úıde bolǵan órt kezinde áıel men onyń 5 jáne 7 jasar balalary, kórshi páterden zeınetker, birinshi top múgedegi qutqaryldy. A.Sýrkonyń kásibı is-áreketi men batyl qımyly nátıjesinde oqıǵa ornynan 6 adam (ekeýi - balalar) qutqarylyp, 12 adam qaýipsiz jerge shyǵaryldy.
«Andreı Antonovıchtiń ózgelerge úlgi bolarlyq basqa da erlikteri az emes. Ol sonymen qatar jas qyzmetkerlerge tálimger bolyp, óziniń bilim-biligi, baı tájirıbesimen bólisip keledi», - dedi baspasóz hatshysy Nurgúl Muqanova.
