Batysqazaqstandyq óner sheberleri Almatyda kontsert qoıdy
BQO mádenıet, muraǵattar jáne qujattama basqarmasynan túsken málimetke qaraǵanda, Almaty sahnasynda Dáýletkereı atyndaǵy qazaq halyq aspaptar jáne oblys ákiminiń estradalyq-sımfonııalyq orkestrleri, ánshiler, Qazaqstannyń eńbek sińirgen qaıratkeri Qatımolla Berdiǵalıev, QR eńbek sińirgen ártisteri Jumaǵanym Rahımova, Qanatqalı Qojaqov, Sáýle Taýdaeva, belgili dombyrashy, Qazaqstannyń eńbek sińirgen mádenıet qyzmetkeri, «Qurmet» ordeniniń ıegeri Ermek Qazıev óz ónerlerin kórsetti. Sondaı-aq almatylyq kórermender «Eren eńbegi úshin» medaliniń ıegerleri Jaskeleń Ǵaısaǵalıev, Marat Sarbópeev, Jańylsyn Hasanova, mádenıet salasynyń úzdikteri Maıra Haıdarova, Kamalıden Aıtbaev jáne basqa jas oryndaýshylardyń ónerine tánti boldy.
Kontsertti BQO ákiminiń orynbasary Igor Steksov ta tamashalady.
«Mundaı keń quramda Almatyǵa birazdan beri jol túspep edi. Táýelsizdiktiń torqaly toıyna oraı oblys basshylyǵynyń qoldaýymen batysqazaqstandyq orkestrler men shyǵarmashylyq ujymdary, jekelegen ártister óz ónerin Alataý tórinde jan-jaqty jarqyratyp kórsetýge múmkindik aldy. Tabysty ótken bul kontsert kórermenderge de, Aq Jaıyqtyń ártisterine de erekshe áser syılady»,- dedi QazAqparat tilshisine BQO mádenıet, muraǵattar jáne qujattama basqarmasynyń basshysy Dáýletkereı Qusaıynov.
