Batysqazaqstandyq oqýshylar respýblıkalyq olımpıadadan oljaly oraldy
ORAL. QazAqparat - Daryndy balalarǵa arnalǵan №11 oblystyq qazaq mektep-ınternaty kesheniniń shákirtteri Qazaqstan tarıhy páni boıynsha Býrabaıda ótken respýblıkalyq HІІ «Tarıh ata» olımpıadasynan oljaly oraldy, dep habarlaıdy «QazAqparat» tilshisi.
Atalmysh mektepten túsken málimetke qaraǵanda, «Daryn» respýblıkalyq ǵylymı-praktıkalyq ortalyǵy uıymdastyrǵan pándik olımpıadanyń onlaın rejıminde ótken bastapqy irikteý kezeńine elimiz boıynsha barlyǵy 1239 oqýshy qatysqan bolatyn. Solardyń ishinen júzden júırik, myńnan tulpar atanyp, úzdik shyqqan 148-i respýblıkalyq «Baldáýren» lagerine shaqyrtyldy. Solardyń qatarynda toqsan jyldan astam tarıhy bar baıyrǵy mekteptiń 7-synyp oqýshylary Orynbaı Muqtar, Eljas Muqambetjanov, Álı Rızýanovtar (ustazdary, tarıh pániniń muǵalimi Asqar Álmuqanov) baq synady. Sóıtip, negizgi kezeń qorytyndysy boıynsha O.Muqtar men E.Muqambetjanov ekinshi, Á.Rızýanov úshinshi orynǵa ıe boldy.
