Batysqazaqstandyq oqýshylar halyqaralyq «RoboLand-2017» jarysynda birinshi orynǵa ıe boldy
ORAL. QazAqparat - Daryndy balalarǵa arnalǵan mamandandyrylǵan S.Seıfýllın atyndaǵy №11 oblystyq mektep-ınternaty kesheniniń shákirtteri Qaraǵandy qalasynda ótken úshinshi halyqaralyq "RoboLand-2017" robot tehnıkasy festıvalinde tabysty óner kórsetti, dep habarlaıdy «QazAqparat» tilshisi.
Balalardy bastap barǵan atalmysh mektep dırektorynyń ǵylymı-ádistemelik jumystar jónindegi orynbasary Jeńis Shońbaevtyń aıtýynsha, halyqaralyq jarysqa Qazaqstan, Reseı elderinen barlyǵy 549 komanda qatysyp, túrli sanat boıynsha synǵa tústi.
Batysqazaqstandyq №11 mektepten úsh birdeı komanda kegelrıng kvadro h 2, ekorobottar jáne shyǵarmashylyq sanattary boıynsha baq synady. Jarys qorytyndysynda «Kerderi» komandasynyń músheleri Dýlat Muratov pen Álibek Zalmuqanov «Qorshaǵan ortany qorǵaý. Ekorobottar» taqyrybyndaǵy shyǵarmashylyq jumysy úshin birinshi oryn alyp, dıplom, medaldarmen, kýbokpen marapattaldy. Sondaı-aq kegelrıng kvadro h 2 sanaty boıynsha «Ný, pogodı!» komandasynyń músheleri Dáýlet Ersaıynov pen Dáýirbek Saqtarov ta birinshi orynǵa kóterilip, dıplom, medal, kýbokqa qosa arnaıy syılyqtardy enshiledi. Al «Strela» komandasyna (Rasýl Sıdıhov pen Maqpal Amangeldıeva) sertıfıkat tabys etildi. Komandalardyń jattyqtyrýshysy J.Shońbaev ta eskerýsiz qalǵan joq.
