Batysqazaqstandyq oqýshy respýblıkalyq olımpıadada júldeger boldy
ORAL. QazAqparat – Batysqazaqstandyq oqýshy Tımýr Bolatov Almatydaǵy Gete ınstıtýty uıymdastyrǵan respýblıkalyq olımpıadada júldeli orynǵa ıe boldy, dep habarlaıdy QazAqparat tilshisi.
Atalmysh olımpıada bıyl koronavırýs indetine baılanysty onlaın rejımde ótti.
Respýblıkalyq synǵa qatysýshylar test tapsyryp, sóıleý daǵdylaryn kórsetti.
Oral qalasyndaǵy Nazarbaev zııatkerlik mektebiniń 11-synybynda oqıtyn T.Bolatov jeńimpaz atanǵan oqýshynyń nátıjesinen sál ǵana az upaı jınap, ekinshi oryndy ıelendi. Ol nemis tili boıynsha halyqaralyq olımpıadaǵa qatysý rezervine endi.
Bul Tımýrdyń birinshi tabysy emes. Budan birneshe aı buryn nemis tilinde saýatty jazýdy nasıhattaý maqsatyndaǵy «Tolles Diktat» halyqaralyq aktsııasyna qatysyp, Qazaqstandy laıyqty túrde tanystyrǵan T.Bolatov birinshi oryn alǵan bolatyn.
Ozat oqýshy jeti jurttyń tilin meńgerýdi armandaıdy. Qazir aǵylshyn tilinen basqa nemis jáne japon tilin úırenip júr.
– Japon tilin meńgerýdi hobbıim dep aıtar edim, jańa nárseni úırený maǵan qýanysh syılaıdy. Men til úırený barysynda bárinen buryn sózdikke súıenemin jáne oqý daǵdysyna mán beremin, óıtkeni bul tildiń mańyzdy bólikteriniń biri dep oılaımyn. Mektep bitirýime áli bir jyl bar. Bolashaqta ınjenerlik nemese aqparattyq tehnologııa salasynyń mamany bolǵym keledi. Ol úshin kóp til bilgenniń artyǵy joq, – deıdi Tımýr Bolatov.
