Batysqazaqstandyq mádenıet qaıratkeri Maqsot Omarǵalıev ómirden ozdy
ORAL. QazAqparat - Batys Qazaqstan oblysynyń mádenıet salasynda jarqyn iz qaldyrǵan Qazaqstannyń eńbek sińirgen qaıratkeri, kásibı mýzykant, ánshi, rejısser Maqsot Omarǵalıev ómirden ótti, dep habarlaıdy «QazAqparat» tilshisi.
Maqsot Konstantınuly 1945 jyly 7 qazan kúni Reseı Federatsııasynyń Volgograd oblysynda dúnıege keldi. Eńbek jolyn 1968 jyly Jánibek aýdandyq mádenıet bóliminde avtoklýb meńgerýshisi bolyp bastaǵan ol bir jyldan keıin Oral qalasyndaǵy mýzyka ýchılışesine vokal mamandyǵy boıynsha oqýǵa tústi.
Maqsot Omarǵalıev 1973-1984 jyldary Ǵ.Qurmanǵalıev atyndaǵy oblystyq fılarmonııanyń solısi, keıin dırektorynyń orynbasary qyzmetin atqardy. 1984-1988 jáne 2003-2005 jyldary oblystyq halyq shyǵarmashylyǵy ortalyǵynyń dırektory, 1988-1992 jáne 2005-2011 jyldary Ǵ.Qurmanǵalıev atyndaǵy oblystyq fılarmonııanyń dırektory boldy. Al 1992-2003 jyldary Batys Qazaqstan oblystyq mádenıet basqarmasyna basshylyq etti. 2011 jyldan beri Ǵ.Qurmanǵalıev atyndaǵy oblystyq fılarmonııanyń kórkemdik jetekshisi bolyp jumys jasady.
Barıton daýysty ánshi «Ushqyn», «Dýman-kontsert», «Jaıyq tolqyny», «Án qanatynda» jáne «Gúlderaıym» jastar ansamblderiniń quramynda óner kórsetip, birqatarynyń irgesi bekip, qanattana túsýine uıytqy boldy. Sondaı-aq qazaq halqynyń ulttyq mýzykasyn nasıhattaý maqsatynda qurylǵan «Oral sazy» folklorlyq-etnografııalyq ansamblin búgingi tańda búkil el biledi. Kóptegen óner ujymdary, kitaphanalar men mýzeıler, basqa da mádenı oshaqtardyń jemisti jumys jasaýyna súbeli úlesin qosty. Óńirdegi iri mádenı-kópshilik sharalardyń barlyǵy rejısserlik qoltańbasy erekshe Maqsot Omarǵalıevtiń qatysýynsyz ótpeıtin. Onyń qoly tıgen jerdiń bári janyp júre beretin, uıymdastyrýshylyq qabileti de, adamgershiligi de mol edi.
