Batysqazaqstandyq qutqarýshylar sý aıdaý jumystaryn júrgizýde
ORAL. QazAqparat - Oraldyq qutqarýshylar qala aýmaǵynda sý aıdaý jumystaryn júrgizýde, dep habarlaıdy «QazAqparat» tilshisi.
BQO TJ departamenti jedel qutqarý jasaǵynyń bas qutqarýshy-psıhology Láıla Ábdirahmanovanyń aıtýynsha, 26-29 naýryz kúnderi kúrt erigen qar men mol túsken jaýyn-shashynnyń áserinen sý keıbir kósheler men aýlalardy basty. Tómen ornalasqan úılerge sý kire bastady. Kommýnaldyq mekeme qyzmetkerlerimen birge qutqarýshylar 27-30 naýryz aralyǵynda Asan, Zachagan jáne Derkól aýyldarynyń kóshelerinde, turǵyn úıler aýlalarynda sýdy aıdaý men sorý jumystaryn júrgizdi. Kúsheıtilgen jumys tártibine kóshken jedel qutqarý jasaǵynyń barlyq jeke quramy jumyldyrylyp, kúni búginge deın 2600-deı tekshe metr sý aıdaldy.
Sonymen qatar qutqarýshylar Jaıyq, Shaǵan jáne Derkól ózenderiniń jaı-kúıine kún saıyn monıtorıng júrgizip, qar sýy basý qaýpi bar aımaqtardy baqylaýda.
BQO TJ departamentinen túsken málimetke qaraǵanda, dál osyndaı jumystar oblys aýdandarynda da júrgizilýde. Mysaly, qalaǵa irgeles Zelenov aýdanynda 29 myńǵa jýyq tekshe metr, Terektide 23200 tekshe metr, Bórlide 600 tekshe metr sý aıdaldy.
