Batysqazaqstandyq qos doıbyshy álem chempıony atandy
ORAL. QazAqparat – Batysqazaqstandyq qos doıbyshy Bolgarııanyń Kranevo qalasynda ótken álem chempıonatynda jeńimpaz atandy, dep habarlaıdy QazAqparat tilshisi.
Dúnıejúzilik dodaǵa álemniń 19 elinen 200-deı sportshy qatysyp, baq synady.
Qazaqstan quramasy sapynda el namysyn qorǵaǵan Ánel Dáýletova 16 jasqa deıingiler, Toǵjan Tájibekova 13 jasqa deıingiler arasynda úzdik shyǵyp, chempıon atandy.
Olardyń bapkerleri – Qazaqstannyń eńbek sińirgen jattyqtyrýshysy Danııar Qadyruly Jumageldıev pen Álııa Zákirjanqyzy Jumageldıeva.
D.Jumageldıevtiń aıtýynsha, doıbyshylardyń ekeýi de múmkin bolǵan 14 upaıdyń 13-in jınady.
«Shákirtterimiz osylaısha buǵan deıingi tabystaryn eseleı tústi. Ánel Dáýletova – jastar arasynda (16 jas) eki dúrkin álem chempıony, birneshe márte Qazaqstan, Azııa jeńimpazy, IDF sport sheberi. Al Toǵjan Tájibekova – birneshe márte Qazaqstan, eki dúrkin Azııa jáne álem chempıony (13 jas), sport sheberligine úmitker», dedi QazAqparat tilshisine D.Jumageldıev.
Danııardyń taǵy bir shákirti ári qyzy, osy birinshilikte halyqaralyq grossmeıster ataǵyn alǵan Altynaı Jumageldıeva 27 jasqa deıingi jastar arasynda synǵa túsip, úshinshi orynǵa ıe boldy.
Eske sala keteıik, budan buryn doıbydan jastar arasynda alty dúrkin álem chempıony Altynaı Jumageldıevaǵa halyqaralyq grossmeıster ataǵy berilgenin jazǵan bolatynbyz.
Doıbyshylar erteń Oralǵa oralady.
