Batysqazaqstandyq qos balýan olımpıada joldamasyna ıe boldy

Aldymen 96 keli salmaqta kilemge shyqqan Beıjiń olımpıadasynyń kúmis júldegeri T.Tıgıev kúshti qarsylastar tap kelse de, óziniń babynda ekenin tanytty. Ásirese, onyń reseılik syralǵy qarsylasy, olımpıada chempıony, álemniń tórt dúrkin jeńimpazy Qajymurat Gatsalovty jeńýiniń ózi nege turady. Jartylaı fınalda Taımuraz boz kilem ıesi, osy joly álem chempıonatynyń kúmis júldegeri atanǵan Serhat Balchıge jol berdi. Bul jerde tóreshilerdiń túrkııalyq balýanǵa búıregi burǵanyn aıtý kerek. Al qola júlde úshin amerıkanlyq balýan Djeıkob Varnermen beldesý kezinde tóreshiler kórer kózge qııanat jasady deýge bolady. Birinshi kezeńde 3:0 esebimen alǵa shyqqan Taımurazǵa qalǵan ýaqytta tóreshiler bergen upaılaryn qaıtyp alyp, jeńisti amerıkalyqqa «syılap» jiberdi.

Álem chempıonatynyń ótken jylǵy qola júldegeri Á.Shapıevtiń sol tabysyn bıyl da qaıtalaýyna múmkindigi boldy. 74 keli salmaqta biraz balýannyń jaýyrynyn jer ıisketken Ábdilhákim qola júlde úshin básekede grýzııalyq Davıd Hýtsıshvılımen beldesti. Birinshi kezeńdi 5:1 esebimen aıqyn basymdylyqpen aıaqtaǵan A.Shapıevtiń, nege ekeni belgisiz, sodan keıin aryny basylyp qalǵandaı boldy. Esesine grýzııalyq balýan órshelene alǵa umtyldy. Eki kezeń teń aıaqtalǵanymen, jerebe grýzııalyqqa joldas boldy.

Batysqazaqstandyq qos balýan bul joly júlde almaǵanymen, eń bastysy, olımpıada joldamasyna qol jetkizdi. Endi olar London olımpıadasynda qarsylastarynan ese qaıtara alady.