Batysqazaqstandyq qol kúresi sheberleri álem chempıonatyna joldama aldy
ORAL. QazAqparat - Taldyqorǵan qalasynda gir sporty jáne qol kúresinen ótken el chempıonatynda BQO quramasy tabysty óner kórsetti, dep habarlaıdy «QazAqparat» tilshisi.
BQO dene shynyqtyrý jáne sport basqarmasynan túsken málimetke qaraǵanda, jasóspirimder men jastar, ardagerler men qyzdar jáne múmkindigi shekteýli jandar arasynda ótken aıtýly dodaǵa barlyq oblystardan komandalar qatysyp, 850-ge jýyq sportshy synǵa tústi.
Birinshilikke Batys Qazaqstan oblysynan barǵan Azon Shaımardanov, Aqtoty Málik, Kenjeqyz Qaýpenova, Anjelıka Stepanıýk el chempıony atansa, Araılym Qanatova qol kúresinen úshinshi orynǵa kóterildi. A.Shaımardanov A.Málik, K.Qaýpenova, A.Qanatova álem jáne Azııa chempıonattaryna joldama aldy. Sol sekildi qola júldege ıe bolǵan Merýert Baınııazova, Qaırat Qulbaraqov jáne Súıesin Qumarov Azııa birinshiligine barady.
Oǵan qosa gir sportynan Qanat Imanálıev, Valerııa Sedova, Gúlnur Saıynova jáne Rasýl Tóleýov el birinshiliginiń qola júldegeri atandy.
Sportshylardy Murat Ibatov, Ǵumar Ájiǵalıev, Nurhat Nysanov, Amanbek Qoshanov, Nııazbek Karlov jáne Nurlybek Jumaǵalıev daıyndap apardy.
Aıta keteıik, batysqazaqstandyq qol kúresi sheberleri budan buryn da álem, Azııa birinshilikterinen oljamen oralyp júr.
