Batysqazaqstandyq kókparshylar saılaýǵa salt atpen keldi

ORAL. QazAqparat – Syrym aýdanyndaǵy «Syrym batyr» kókpar komandasynyń músheleri saılaýǵa salt atpen keldi, dep habarlaıdy QazAqparat tilshisi.

Komanda kapıtany Tólebı Qaıyrjanovtyń aıtýynsha, olardyń basym kópshiligi Óleńti aýylynda turady.

Ózderi №293 saılaý ýchaskesine birdeı kıim kıip, salt atpen barýdy uıǵarǵan.

«Qazaq qoǵamy sońǵy kezde rýhanı jańǵyrý, ata-baba saltyn berik ustanýǵa bet bura bastady. Alash balasy atqa qonbaı, rýhtanyp, jigerlene almaıdy. Sonyń ishinde Kúnbatys Alashordasy tý tikken Syrym óńirinde at sportynyń keń qanat jaıǵany kerek. Jańa Qazaqstanǵa da baıyrǵy turmysymyz, salt-dástúrimizdi jańǵyrta barýymyz qajet. Osyndaı birligi bekem, taqymy myqty eldiń erteńine nege senbeske! Biz de óz daýsymyzdy sol úshin berdik», dedi Tólebı Qaıyrjanov.

«Syrym batyr» kókpar komandasy oblystyq jarystarda júlde alyp júr. Onyń ústine Tólebıdiń ózi aýyldyń búkil balasyn aqysyz atqa minýge úıretti.

Eske sala keteıik, budan buryn BQO saılaýshylarynyń daýys berýge otbasymen kelip jatqanyn jazǵan bolatynbyz.