Batysqazaqstandyq karateshiler halyqaralyq týrnırde 5 «altyn» aldy
ORAL. QazAqparat - Batysqazaqstandyq karateshiler Astanada ótken halyqaralyq týrnırde 5 altyn júldeni jeńip aldy, dep habarlaıdy «QazAqparat» tilshisi.
«Kazakhstan Open 2017» halyqaralyq týrnırine Qazaqstan óńirlerimen qatar Reseı men Qyrǵyzstannan 450 sportshy qatysyp, baq synady. Segiz jasar jáne odan joǵary balalar arasynda kıokýshınniń birneshe federatsııalarynan úmitkerler chempıondyq ataq úshin talasty. 12 jastan joǵarylar arasyndaǵy kata boıynsha jarys ta tartysty ótti. Erler arasyndaǵy tameshıvarı (taqtaı syndyrý) syny naǵyz aıqasqa aınaldy.
Joǵary deńgeıde uıymdastyrylǵan týrnır qorytyndysynda BQO quramasy 5 altyn, 7 kúmis jáne 2 qola júldeni jeńip aldy. Ásirese, 60 kg salmaqta áıelder arasynda Elnara Toǵyzbaeva, sondaı-aq 14-15 jastaǵylardan Nurgúl Saparova (50 kg), Eskendir Jomart (8-9 jas, 30 kg) top jardy. Islambek Aqberlın (10-11 jas) men Qaraqat Asylbekqyzy (8-9 jas) absolıýtti salmaqta úzdik atandy.
Týrnır barysynda jyl qorytyndylary boıynsha úzdikter atalymdar boıynsha marapattaldy. Sonyń ishinde batysqazaqstandyq fılıal respýblıkalyq kıokýshınkaı-kan karate federatsııasynyń úzdik fılıaly atandy.
«Jyl qorytyndysymen osyndaı júlde alýym barsha batysqazaqstandyq karateshilerdiń tabysy dep oılaımyn. Halyqaralyq dodalarda atoı sala alatynyn taǵy bir márte dáleldegen shákirtter tárbıelep júrgen jattyqtyqtyrýshylarǵa da alǵysymdy aıtamyn», dedi «QazAqparat» tilshisine fılıal jetekshisi Solongo Ishan.
Aıta keteıik, týrnırde úzdik sportshylar da marapattaldy. Kishi jastaǵylar arasynan Aıbek Amanov pen Janel Edlıpova, jasóspirimderden Maksım Vasılev pen Sofıa Kartavtseva, jastardan Jandos Tuıaqov pen Mádına Saýytova, erler men áıelderden Temirlan Jánibekov pen Aıaýlym Muratova úzdik atandy. 
