Batysqazaqstandyq karateshi Azııa chempıonatynyń qola júldegeri atandy
ORAL. QazAqparat - Japonııanyń Okınava qalasynda karateden kadetter, jasóspirimder jáne jastar arasynda búgin bastalǵan Azııa chempıonatynda batysqazaqstandyq Kámıla Jolamanova qola júldeger atandy, dep habarlaıdy QazAqparat tilshisi.
Onyń bapkeri Asqar Dosjanovtyń aıtýynsha, Kámıla karateniń olımpıadalyq WKF túrinen 14-15 jastaǵylar arasynda 54 kg salmaq dárejesinde synǵa tústi.
Batys Qazaqstan oblysynan jalǵyz barǵan K.Jolamanova alǵashqy básekesinde negizgi qarsylastyń biri, ırandyq sportshyny 1:0 esebimen tize búktirdi. Sodan keıin vetnamdyqqa 0:4 esebimen ese jiberdi. Qola júlde úshin básekede Makaodan kelgen qytaılyq qyzdy 8:2 esebimen aıqyn basymdylyqpen utty.
Osylaısha K.Jolamanova karate Olımpıada baǵdarlamasyna engizilgennen beri BQO boıynsha tuńǵysh ret Azııa chempıonatynyń júldegeri atanyp otyr.
Jarystyń alǵashqy kúni Qazaqstan quramasy 1 altyn, 1 kúmis jáne 3 qola medalmen jalpykomandalyq esepte Japonııa men Irannan keıin úshinshi orynǵa shyqty. 
Shymkenttik Oljas Qulajan 14-15 jastaǵylar arasynda 70 kg salmaqta altynnan alqa taqty. Almatylyq Lııa Qoshqarbaeva Kata baǵdarlamasy boıynsha kúmis júldege qol jetkizdi. Sondaı-aq 14-15 jastaǵylar arasynda qaraǵandylyq Valerııa Rýdakova (54 kg) men aqtaýlyq Bekarys Salaýat (57 kg) úshinshi orynǵa kóterildi.
Aıta keteıik, Azııa birinshiligi 13 mamyr kúni márege jetedi.
