Batysqazaqstandyq karateshi álem chempıonatynda kúmis júldeger atandy
ORAL. QazAqparat - Bolgarııanyń Varna qalasynda 12-17 jastaǵylar arasynda kıokýshınkaı karate KWU-dan ótken álem chempıonatynda Qazaqstan quramasy tabysty óner kórsetti, dep habarlaıdy QazAqparat tilshisi.
Ulttyq respýblıkalyq kıokýshınkaı-kan federatsııasy BQO fılıalynyń dırektory Solongo Ishannyń aıtýynsha, dúnıejúzilik dodaǵa álemniń eń kúshti degen 751 karateshisi qatysty.
«KWU - kıokýshınkaı karateniń birikken álemdik qaýymdastyǵy. Álem birinshiliginde básekelestik joǵary boldy. Mine, sondaı aıtýly dodada batysqazaqstandyq shákirtimiz Nurgúl Saparova kúmis júldege qol jetkizdi. Nurgúl úsh kezdesýinde jeńiske jetip, tek sońǵy básekede tóreshiler sheshimimen 2016 jylǵy álem chempıonyna jol berdi. Bul - úlken jeńis», - dedi QazAqparat tilshisine S.Ishan.
Aıta keteıik, álem birinshiliginde Qazaqstan quramasy jalpy esepte 1 altyn, 3 kúmis, 6 qola medalmen úshinshi orynǵa kóterildi. Maǵjan Ábdýhalyq chempıon atansa, Nurgúlden basqa Rahat Janǵabylov pen Kámıla Kemelbekova kúmis júldege ıe boldy. Sonymen qatar Aıbek Shaýkılov, Aldııar Dosymov, Janel Edlıpova, Medet Ájibek, Bekarys Suraǵanbek, Nurasyl Myqtybek qola medaldi enshiledi.
