Batysqazaqstandyq ǵalym JOO-nyń úzdik oqytýshysy atandy
ORAL. QazAqparat - Jáńgir han atyndaǵy Batys Qazaqstan agrarlyq-tehnıkalyq ýnıversıteti mashına jasaý fakýltetiniń kafedra meńgerýshisi, tehnıka ǵylymdarynyń kandıdaty Nurgúl Ádilova 2016 jyldyń qorytyndysy boıynsha QR Bilim jáne ǵylym mınıstrligi jarııalaǵan «Joǵary oqý ornynyń úzdik oqytýshysy» respýblıkalyq baıqaýynyń grant ıegeri atandy, dep habarlaıdy «QazAqparat» HAA tilshisi.
Joǵary oqý ornyn ınjener-jolshy mamandyǵy boıynsha bitirgen Nurgúl Bolatqyzy atalmysh ýnıversıtette 2002 jyldan beri ustazdyq etip keledi. Aldymen mashınalardy paıdalaný jáne ómirlik qyzmet qaýipsizdigi kafedrasynda eńbek etken ol 2007 jyly qurylys jáne qurylys materıaldary kafedrasyna aýysty. 2013 jyldan beri kafedra meńgerýshisi qyzmetin atqaryp kele jatqan jas ǵalym osy kezge deıin seksennen astam ǵylymı jáne oqý-ádistemelik eńbek jarııalasa, sonyń ekeýi - monografııa, ónertapqysh retinde bes avtorlyq kýáligi, 1 ınnovatsııalyq patenti bar. 2009 jyly Batys Qazaqstan oblysynyń jas úzdik ǵalymy atansa, 2010 jyly kandıdattyq dıssertatsııasyn sátti qorǵap shyqty. Halyqaralyq, respýblıkalyq baıqaýlarǵa da qatysyp, júldeger atanýmen birge tájirıbe jınaqtap úlgergen Nurgúl Ádilovanyń sońǵy úsh jylda 11 magıstr daıarlaǵany jáne bar.
«Jańa jyl aldynda eldiń úzdik oqytýshylary qataryna iligýim, árıne, jaqsy jańalyq boldy. 2017 jyly QR Bilim jáne ǵylym mınıstrliginiń respýblıkalyq oqý-ádistemelik keńesi usynǵan «Qurylys materıaldaryn ǵylymı zertteý negizderi» atty oqý quralyn jaryqqa shyǵarǵym keledi. Sonymen qatar Qazaqstannyń ǵylymı jýrnaldarynda, alys-jaqyn shetelderde ǵylymı-zertteý jumystarymnyń nátıjesin kórsetkim keledi. Oǵan qosa shetelderdegi jetekshi JOO-larda biliktiligimdi odan saıyn jetildire tússem deımin», dedi «QazAqparat» tilshisine N.Ádilova.
Aıta keteıik, atalmysh baıqaýǵa respýblıkadaǵy 88 JOO-dan 444 úmitker qatysyp, sonyń 200-i jeńimpaz atanǵan. Bul grant osy oqytýshylarǵa álemniń jetekshi ýnıversıtetterinde ǵylymı-zertteý jumystaryn jazý jáne biliktiligin arttyrý maqsatynda taǵylymdamadan ótýlerine múmkindik beredi.
