Batysqazaqstandyq dzıýdoshylar halyqaralyq jarysta júldeger atandy
ORAL. QazAqparat - Batysqazaqstandyq sportshylar Aqtóbe qalasynda Keńes Odaǵynyń Batyry Álııa Moldaǵulovany eske alýǵa arnalǵan dzıýdodan ótken halyqaralyq jarysta júldeger atandy, dep habarlaıdy «QazAqparat» tilshisi.
BQO dene shynyqtyrý jáne sport basqarmasynan túsken málimetke qaraǵanda, atalmysh týrnırge Ózbekstan, Reseı, Grýzııa jáne Qazaqstan elderinen palýandar qatysyp, baq synady. Jarys qorytyndysynda Ernazar Hamzın 90 kg salmaqta qola júldeger atandy. Sondaı-aq 100 kg salmaqta Temirlan Kólbaı kúmis medalǵa ıe bolsa, Oljas Súleımenov úshinshi orynǵa kóterildi. Olardy dzıýdodan BQO quramasynyń aǵa bapkeri Saıyn Erǵalıev jattyqtyrady.
Aldaǵy ýaqytta atalǵan dzıýdoshylar Reseıdiń Orynbor qalasynda ótetin Eýropa kýbogyna qatyspaqshy.
Eske sala keteıik, taıaýda E.Hamzın men T.Kólbaı qazaq kúresinen Elbasy Nursultan Nazarbaevtyń júldesi úshin dástúrli «Qazaqstan barysy» týrnıriniń oblystyq kezeńinde ozyq shyǵyp, Astanada «EKSPO-2017» kórmesi aıasynda ótetin respýblıkalyq saıysqa joldama alǵan bolatyn.
