Batysqazaqstandyq dzıýdoshylar halyqaralyq týrnırde chempıon atandy
ORAL. QazAqparat - Batysqazaqstandyq sportshylar Qyzylorda qalasynda 1998-1999 jylǵylar arasynda dzıýdodan qoǵam qaıratkeri, Qarmaqshy aýdanynyń qurmetti azamaty Bolatbek Súleımenovti eske alýǵa arnalǵan halyqaralyq týrnırde sátti óner kórsetti, dep habarlaıdy «QazAqparat» tilshisi.
BQO dene shynyqtyrý jáne sport basqarmasynan túsken málimetke qaraǵanda, atalmysh jarysqa Qazaqstan óńirleri men Ózbekstan, Qyrǵyzstan elderinen eki júzdeı tatamı sheberi qatysyp, 16 salmaq dárejesi boıynsha synǵa tústi. Bul QR sport sheberi normatıvin oryndaý úshin ball esepteletin reıtıngilik týrnır edi.
Jarys qorytyndysynda Batys Qazaqstan oblysynan barǵan Toqtar Úmitálıev 60 kg salmaqta jeńimpaz atandy. 73 kg salmaqta Saıt Seıtqalıev chempıon bolsa, taǵy bir batysqazaqstandyq Ańsarbek Ǵaınýllın úshinshi orynǵa kóterildi.
