Batysqazaqstandyq «Dala dıdary» ujymy Mańǵystaýda óner kórsetti

Qadyr Myrza Álı atyndaǵy mádenıet jáne óner ortalyǵy (dırektory, aqyn Baýyrjan Halıolla) janynan qurylǵan atalǵan ujym aldymen Jańaózen, sodan keıin Aqtaý qalasynda kontsert qoıdy. Jazýshy-jýrnalıst Baýyrjan Ǵubaıdýllın tizginin ustaǵan keshte Jaıyq eliniń saǵynysh-sálemin «Aq Jaıyq» ánimen Dastan Esentemirov jetkizse, Jaskeleń Ǵaısaǵalıev «Syǵan serenadasyn» áýelete shyrqady. Gúlzada Ahmetova «Tamdy arýyn» tamyljytsa, Erlan Qýanyshev «Kezder-aı» ánin shynaıy sezimmen saldy. Ernar Ómiráli «Qazaq osy...» dep halyqtyń barsha qasıet-qyryn ashyp berdi. Basqa ánshiler de olardan qalysqan joq.

Keshterde Qadyr aqynnyń sózderine jazylǵan ánder oryndalyp qana qoıǵan joq. Qazaqtyń uly aqyny týraly ǵıbratty áńgimeler aıtyldy. Ásirese, osy óner saparynda birge júrgen belgili aqyndar, Memlekettik syılyqtyń jáne halyqaralyq «Alash» ádebı syılyǵynyń laýreaty Esenǵalı Raýshanov pen Tólegen Aıbergenov atyndaǵy syılyqtyń ıegeri Svetqalı Nurjan sheshile de kósile sóılep, Qadyr jyrlarynyń máńgilik jasaı beretindigin sheber jetkizdi. «Qadekeń ısi Alashqa ortaq aqyn. Onyń qaı jyryn alyp qaramaıyq, qazaqtyń kez kelgen jerine arnaldy deýge bolady. Halyqtyń qadir-qasıetin Qadyrdan artyq jyrlaǵan aqyn joq. Onyń sózderine úsh júzden astam án jazylǵan eken. Mine, bul  bir ǵana Qadyrdyń shyǵarmashylyǵyn nasıhattaý sııaqty bolyp kóringenimen, túptep kelgende, qazaq degen ulttyń rýhanı murasyn halyqqa jetkizý bolyp tabylady. Mundaı sharalar Elbasynyń «Rýhanı jańǵyrý» baǵdarlamasynyń maqsat-muratymen tolyq úndesedi», dedi E.Raýshanov.

Aqtaýdaǵy kesh sońynda Mańǵystaý óńiriniń basshysy Eraly Toǵjanovtyń atynan sóılegen oblys ákiminiń orynbasary Maqsat Sqaqov ta sózdiń maıyn tamyzyp, Mańǵystaý elin bir serpiltip tastaǵan «Dala dıdary» ujymyna rızashylyǵyn bildirdi.

Qos óńirdiń arasyndaǵy mundaı rýhanı-mádenı baılanys budan keıin de jalǵasatyn bolady.

Aıta keteıik, ashylǵanyna úsh jylǵa jeter-jetpes ýaqyt bolǵan Qadyr Myrza Álı atyndaǵy ortalyq qolǵa alǵan jobanyń biri - osy «Dala dıdary» kóshpeli óner ujymy. Qadyr aqynnyń shyǵarmalaryn keńinen nasıhattaý maqsatynda «Dala dıdary» buǵan deıin Oral qalasy men óńir aýdandarynan bólek, kórshiles Atyraý oblysynda da bolyp, óz ónerlerin kórsetken edi.