Batysqazaqstandyq bes oqýshyǵa «EKSPO-2017» kórmesine joldama berildi
ORAL. QazAqparat - Búgin Oraldaǵy Nazarbaev zııatkerlik mektebinde «25 juldyzdy kún» aıasynda ashyq esik kúni ótip, oǵan óńirdiń bes aýdanynan kelgen 200-ge jýyq oqýshy qatysty, dep habarlaıdy QazAqparat tilshisi.
Nazarbaev zııatkerlik mektebiniń dırektory Sholpan Qadyrovanyń aıtýynsha, sharaǵa az qamtylǵan jáne kóp balaly otbasylardan shyqqan, oqý men sportta, ónerde alda júrgen balalar shaqyryldy. Olar bul kúni mektep ishin aralap, sabaqtarǵa qatysyp, jas ónertapqyshtardyń ǵylymı-zertteý jobalarymen tanysty. Ózderimen shamalas qurby-qurdastarymen pikir almasyp, oı-ıdeıalarymen bólisti.
Zııatkerlik mektep muǵalimderi «Sıqyrly matematıka», fızıkada «TehnoLab», qazaq tili, tarıh, geografııada «Tilim, tarıhym, mekenim», bıologııada «Miracle Of Life», ınformatıkada «Robotics» dep atalatyn baǵyttarda qyzyqty zerthanalyq tájirıbeler, tanymdyq oıyndar kórsetti. Robot tehnıkasy, avıamodeldeý, kózeshi óneri boıynsha sheberlik saǵattaryn, hımııalyq tájirıbeler shoýyn usyndy. Sondaı-aq oqýshylar mekteptiń «Týǵan elge taǵzym», «Shańyraq», «TEDx NIS», «Qazaqtyń 100 kúıiniń tarıhy», «100 kitap», «100 qazaq áni» jáne «Bookcrossing», «Qazaqsha Wikipedia» sekildi negizgi jobalary, áleýmettik tájirıbeler, mashyq túrleri, úıirme jumystarymen tanysty.
Ashyq esik kúniniń sońynda osy oqýshylardyń arasynan syrymdyq Arý Álmuratovaǵa, zelenovtyq Zaınel Karshgıevaǵa, bórlilik Albına Medetovaǵa, aqjaıyqtyq Іlııas Maratovqa, terektilik Lázzat Ablaevaǵa Astana qalasynda ótetin halyqaralyq «EKSPO-2017» kórmesin tamashalaýǵa jáne «Nazarbaev zııatkerlik mektepteri» DBUU-nyń janyndaǵy beskúndik jazǵy lagerge qatysýǵa sertıfıkat berildi. Bul sertıfıkattyń qarjysyn Nazarbaev zııatkerlik mektebiniń oqýshylary Táýelsizdiktiń 25 jyldyǵyna oraı ótkizilgen qaıyrymdylyq kórme-jármeńkeler arqyly jınaǵan edi.
Saltanatty jabylý rásiminde óńirdiń jas ánshileri Danııar Rahmetjanov pen Alına Gerts tanymal «07 aımaq» ánimen Táýelsizdikke oraılastyrǵan bul kúnniń kórkin kirgizdi. Ánniń áýenimen barlyq oqýshylar «Alǵa, Qazaqstan» fleshmobyn bıledi. Keıin barlyǵy mektep aýlasyna shyǵyp, «Bıikke samǵaımyz!» deen uranmen zııatkerlerdiń «Avıamodeldeý» úıirmesinde jasaǵan raketasyn ushyrdy.
Aıta keteıik, bul kúni barlyq Nazarbaev zııatkerlik mektepterinde «Biryńǵaı ashyq esik kúni» ótti. Oǵan elimizdiń 4000-ǵa jýyq oqýshysy qatysty.
