Batysqazaqstandyq belgili jyrshy-termeshi ómirden ozdy
ORAL. QazAqparat - Batysqazaqstandyq belgili jyrshy-termeshi, Mádenıet qaıratkeri Kósherǵalı Makarov ómirden ozdy, dep habarlaıdy «QazAqparat» tilshisi.
Oblystyq halyq shyǵarmashylyǵy ortalyǵynan túsken málimetke qaraǵanda, Kósherǵalı Makarov 1951 jyly Atyraý oblysy Qyzylqoǵa aýylynda dúnıege keldi. Orta mektepten keıin tehnıkalyq ýchılışeni bitirgen.
1968 jyly Batys Qazaqstan oblysy Taıpaq aýdany Bazarsholan aýylyna kelip, aýyl sharýashylyǵy salasynda qyzmet atqardy. Degenmen jastaıyn ónerge qumar Kósherǵalı Makarov dombyramen án salyp, aýyl-aımaqqa tanymal bolady. 1970 jyldan mádenıet salasyna aýysyp, Bazarsholan aýylynda avtoklýb meńgerýshisi bolyp jumys jasady.
1980 jyly Aqtóbe mádenı-aǵartý ýchılışesin bitirip, 1982 jyldan zeınet jasyna deıin qazirgi Aqjaıyq aýdany (burynǵy Taıpaq) Sarytoǵaı aýylynda mádenıet úıiniń jetekshisi boldy.
K.Makarov mádenıet salasynda qyzmet atqarýmen birge Qazaqstannyń batys óńirinde jyrshylyq ónerdiń úzilmeýine óz úlesin qosty. Ózi sekildi elge tanymal shákirtter tárbıelep, ózindik óner mektebin qalyptastyrdy. Dástúrli ánder men qazaq jyrlaryn nasıhattaý maqsatynda TMD elderine de óner saparyna shyǵyp, Muhıt, Ǵarıfollalar salyp ketken sara joldyń jalǵastyrýshysy boldy.
Kósherǵalı Makarov tabıǵı talantynyń arqasynda kóptegen tabystarǵa qol jetkizip, eldiń qoshemetine bólendi. Atap aıtqanda, 1980 jyly Muhıt Meráliulynyń 140 jyldyǵyna arnalǵan ánshiler baıqaýynyń, 1988 jyly Almaty qalasyndaǵy respýblıkalyq jyrshy-termeshiler baıqaýynyń, 1988 jyly Baký qalasyndaǵy dúnıejúzilik jyrshylar baıqaýynyń, 1989 jyly Túrki halyqtary dastanshylarynyń halyqaralyq óner festıvaliniń laýreaty atandy. Sondaı-aq 2001 jyly Qyzylorda qalasyndaǵy «Ǵasyrlar úni» jyrshylardyń «Jıenbaı jyraý» atyndaǵy baıqaý júldegeri, 2005 jyly Mańǵystaý qalasyndaǵy «Shotan batyr» jyrshylar baıqaýynyń laýreaty boldy. Al 2005 jyly QR Mádenıet, aqparat jáne sport mınıstrligi men QR Mádenıet pen ónerdi qoldaýdyń memlekettik qorynyń «Mádenıet qaıratkeri» qurmet belgisimen marapattaldy.
