Batysqazaqstandyq balýan E.Larıonova Mınskide ótken halyqaralyq týrnırdiń kúmis júldegeri atandy
ORAL. QazAqparat - Mınsk qalasynda úsh márte olımpıada chempıony Aleksandr Medvedtiń júldesi úshin erkin kúresten halyqaralyq Gran-prı týrnıri márege jetti.
Osymen 45-inshi ret ótkizilip otyrǵan mereıtoılyq jarysqa ırandyq sportshylardan basqa álemniń eń myqty degen balýandary qatysty. Olardyń arasynda olımpıada, álem chempıondary men júldegerleri boldy. Aıtalyq, áıelder kúresinen 63 keli salmaqta batysqazaqstandyq Ekaterına Larıonova fınalda Beıjiń olımpıadasynyń qola júldegeri, kolýmbııalyq Jaklın Renterıamen kilemge shyqty. Sóıtip, osy beldesýde ǵana ese jibergen ótken jylǵy álem chempıonatynyń qola júldegeri E.Larıonova atalmysh jarysta kúmisten alqa taqty. Sondaı-aq taǵy bir qazaqstandyq Aıym Ábildına 58 kelide vengrııalyq Marıanna Sastınnen utylyp, kúmis júldege qol jetkizdi. Oǵan qosa Dáýlet Nııazbekov (61 kg), Saıatbek Oqasov (65 kg), Eleonora Ábýtalıpova (48 kg), Aıjan Ismaǵulova (55 kg) qola júldeger atandy.
