Batysqazaqstandyq balǵyn boksshylar el chempıonatynan úlken tabyspen oraldy
ORAL. QazAqparat - Batysqazaqstandyq sportshylar Qostanaı qalasynda 2003-2004 jylǵy jasóspirimder arasynda bokstan ótken QR chempıonatynan úlken tabyspen oraldy, dep habarlaıdy «QazAqparat» tilshisi.
Bokstan jasóspirimder arasyndaǵy BQO quramasynyń aǵa jattyqtyrýshysy Ernar Nurıdenovtiń aıtýynsha, oblystan barǵan segiz boksshynyń tórteýi jeńimpaz-júldegerler qatarynan kórindi. Atap aıtqanda, Sanjar Marksov 36 kg salmaqta chempıon atandy. Ony sportqa daryndy balalarǵa arnalǵan mamandandyrylǵan oblystyq mektep-ınternatynyń bapkerleri Ernar Nurıdenov, Denıs Knıazev jáne Erjan Kındıhov jattyqtyrady. Alǵashqy ustazy - Qaztalov aýdany Bostandyq aýylynan Aslanbek Sarmalaev. Sol sekildi balalar men jasóspirimder boks sport mektebiniń (BJBSM) shákirti Beıbit Ibatov 54 kg salmaqta eshkimge des bermedi. Ony Qazaqstannyń eńbek sińirgen jattyqtyrýshysy Qýanysh Ýahasov baptaıdy.
Oǵan qosa BJBSM-nan barǵan Qaısar Qııasov (bapkeri Azamat Sultanov) 42 kg, Muhamed Orash (jattyqtyrýshylary Erjan Kárimov pen Arman Rahmetov) 44 kg salmaqta fınalǵa deıin jetip, kúmis medaldi enshiledi.
«Osylaısha, balǵyn boksshylarymyz eki altyn, qos kúmis júldege ıe bolyp, oblys tarıhynda buryn-sońdy bolmaǵan nátıjege qol jetkizdi. Endi oqý-jattyǵý jıyndary ótip, sonda el namysyn qorǵaıtyn qurama músheleri belgili bolady», dedi «QazAqparat» tilshisine E.Nurıdenov.
