Batysqazaqstandyq áıel 61 jyl boıy qujatsyz ómir súrgen
ORAL. QazAqparat - Aqjaıyq aýdanynda turatyn 61 jastaǵy Qaıyrly Іzbasarova jeke basyn kýálandyratyn qujatsyz ǵumyr keshken.
BQO prokýratýrasynyń baspasóz qyzmetinen túsken málimetke qaraǵanda, ol buǵan deıin oblys pen aýdan ákimdikterine, ádilet basqarmasyna júgingenmen, qoldaý tappaǵan. Sodan keıin qyzy Taljibek Jumasheva Aqjaıyq aýdanynyń prokýratýrasynan anasynyń jeke basyn anyqtaıtyn qujat alyp, zeınetaqysyn rásimdeýine kómek kórsetýin ótingen. Prokýratýra qyzmetkerleri naqty jumystar júrgizip, 1955 jyldan bastap muraǵattyq qujattar qaraldy.
Q.Іzbasarovanyń boljamdy jasyn anyqtaý úshin medıtsınalyq-klınıkalyq tekserý júrgizildi. Sondaı-aq Alǵabas aýyldyq okrýgi aqsaqaldarynyń qatysýymen jıyn ótkizilip, kýálardan jaýap alyndy. Sonyń nátıjesinde jetkilikti negizdermen jáne jınalǵan qujattarmen aýdandyq sotqa talap-aryz berildi. Aýdandyq sot prokýrordyń talabyn qanaǵattandyryp, Qaıyrly Іzbasarovanyń 1955 jyly 12 mamyrda dúnıege kelgendigi anyqtaldy. Endi ol týý týraly kýáligin, jeke kýáligin alýǵa quqyly jáne jasyna baılanysty zeınetaqy rásimdeı alady.
Eske sala keteıik, budan buryn dál osy Aqjaıyq aýdanynda turatyn, seksen jyl boıy qujatsyz ómir súrgen Mádına Sansyzbaevanyń da prokýratýranyń aralasýymen 1936 jyly 16 naýryzda dúnıege kelgeni týraly zańdyq deregi belgili bolǵan edi.
