Batysqazaqstandyq ártister Aýstrııa elinde óner kórsetti
ORAL. QazAqparat - Batysqazaqstandyq ártister Aýstrııa elinde óner kórsetti, dep habarlaıdy QazAqparat tilshisi.
Batysqazaqstandyqtardyń bul gastroldik sapary QR tuńǵysh Prezıdenti N.Á.Nazarbaevtyń «Bolashaqqa baǵdar: rýhanı jańǵyrý» jáne «Uly dalanyń jeti qyry» maqalasy aıasynda uıymdastyryldy.
Aldymen Vels qalasynda jergilikti kórermender qazaq eliniń ónerpazdary salǵan án men bılegen bılerine kýá boldy.
Ǵ.Qurmanǵalıev atyndaǵy oblystyq fılarmonııasy "Oral sazy" folklorlyq ansambli, Oral qalalyq "Saltanat" bı ansambli, Dastan Esentemirov, Darııa Baqytova, Aıbar Haıyrhanov, Erkin Ótegenov syndy óner ıeleri sahnaǵa shyǵyp, sheteldikterdi tánti etti.
Motsart, Bethoven, Shýbert, Shtraýstaı uly kompozıtorlardyń klassıkalyq týyndylary saltanat qurǵan elde «Qyz Jibek» operasynan «Gákký» áýelep, «Shegeniń arııasy» shyrqaldy. Aqqýdan arýlar myń burala bıledi sahnada. Abaı, Birjan sal, Nurǵısadaı birtýar daryndardyń shyǵarmalary oryndaldy. Kúmbirlegen kúıge de kezek berildi.
Batysqazaqstandyq ónerpazdar elimizdiń ulttyq mádenıetin tanytý, folklorlyq ónerdi nasıhattaý maqsatynda sondaı-aq Krems qalasynda «Uly dala áýezi» atty kontsert qoıdy. Munda da sheteldik kórermender qazaq ónerin yqylas qoıa tamashalady.
Kesh sońynda Qazaqstannyń Aýstrııa elindegi elshisi Qaırat Sarybaı sóz sóılep, batysqazaqstandyq óner ujymyna shyǵarmashylyq tabys pen shabyt tiledi.
«Óńirimizdiń óneri men mádenıetin Eýropa jerinde tanytýǵa múmkindik jasaǵan oblys basshylyǵy men Qazaqstannyń Aýstrııadaǵy elshiligine rızashylyǵymyzdy bildiremiz», dedi batysqazaqstandyqtardy bastap barǵan oblystyq mádenıet basqarmasynyń basshysy Qadyrbolat Musaǵalıev.
