Batysqazaqstandyq ardager samboshylar el chempıonatynda top jardy
ORAL. QazAqparat - Túrkistan qalasynda sambodan sport sheberleri arasynda márege jetken el chempıonatynda BQO quramasy jalpykomandalyq birinshi orynǵa ıe boldy, dep habarlaıdy «QazAqparat» tilshisi.
BQO dene shynyqtyrý jáne sport basqarmasynan túsken málimetke qaraǵanda, atalmysh jarysqa elimizdiń 14 oblysynan 160 ardager samboshy qatysyp, jeti jas ereksheligine qaraı (35 jastan joǵary) kilemge shyqty.
Chempıonat qorytyndysynda BQO palýandary 8 altyn, 4 kúmis jáne 8 qola medaldi jeńip aldy. Atap aıtqanda, jas erekshelikterine qaraı Bolat Málikov, Qaısar Qusaıynov, Qýanysh Ábýov 74 kg, Batyrbek Ihsatov 100 kg, Erjan Abatov 100 kg joǵary, Qazbolat Qurmashev 68 kg, Ǵadilbek Satybaldıev 90 kg jáne Ramazan Nurmashev 82 kg salmaqta altynnan alqa taqsa, Ǵanımat Jubashev (62 kg), Talǵat Jarmuhambetov (68 kg), Rýslan Jaqypov pen Aıbek Meńdiǵalıev (82 kg) ekinshi orynǵa kóterildi. Al Málik Tólegenov (68 kg), Tilek Kákenov (82 kg), Jumagereı Dinishev (+100 kg), Amangeldi Baqtııarov (62 kg), Marat Esmaǵulov (74 kg), Aıtbaı Tastaıbekov (100 kg), Eres Ǵabdrahmanov (62 kg), Chapaı Imanǵalıev (62 kg) qola júldeni ıelendi. Jalpykomandalyq esepte Jambyl oblysy quramasy ekinshi, ońtústikqazaqstandyq palýandar úshinshi orynǵa kóterildi.
Sambo kúresinen ardagerler arasynda BQO quramasynyń aǵa jattyqtyrýshysy Qazbolat Qurmashevtiń aıtýynsha, sambodan ardagerler arasynda bıylǵy álem chempıonaty 23-25 qazanda Grekııanyń Halkıdıkı qalasynda ótedi. El chempıonatynda úzdik shyqqandar endi osy dúnıejúzilik dodaǵa daıyndalady.
Aıta keteıik, Q.Qurmashev osyǵan deıin ardagerler arasynda alty dúrkin álem chempıony atanǵan bolatyn. Sondaı-aq Chapaı Imanǵalıev, Ramazan Nurmashev, Qýanysh Ábýov jáne Qaısar Qusaıynov ta - álem birinshiliginde úzdik shyǵyp, ábden ysylǵan, tájirıbeli palýandar.
