Batysqazaqstandyq ánshi respýblıkalyq festıvaldiń júldegeri atandy
ORAL. QazAqparat - Batysqazaqstandyq ánshi Ernar Ómiráli Óskemende ótken Ámire Qashaýbaev atyndaǵy respýblıkalyq dástúrli ánshiler festıvaliniń júldegeri atandy, dep habarlaıdy QazAqparat tilshisi.
Atalmysh óner dodasyn QR Mádenıet jáne sport mınıstrligi Astananyń 20 jyldyǵy aıasynda halqymyzdyń dástúrli án ónerin keńinen nasıhattaý maqsatynda uıymdastyrdy.
Daryndy jas ónerpazdardy anyqtaý, olardyń kásibı sheberlikterin jetildirý, Birjan, Aqan, Balýan Sholaq, Maıra Ýálıqyzy, Muhıt Meráliuly, Estaı Berkimbaıuly, Ámire Qashaýbaev syndy qazaqtyń uly ánshilerin ulyqtaýdy murat tutqan festıval bes kúnge sozyldy.
Aıtýly saıysqa Qazaqstannyń túkpir-túkpirinen festıval sharty boıynsha 20 men 35 jas aralyǵyndaǵy 34 úmitker qatysyp, baq synady. Olar úsh kezeńnen turǵan baıqaý barysynda usynylǵan ánderdi oryndady. Sonyń ishinde qatysýshylar Ámire Qashaýbaevtyń repertýaryndaǵy ánderdi shyrqaýǵa mindetti boldy.
Festıval qorytyndysynda astanalyq Asqar Muqııat bas júldeni (1 mln teńge) jeńip aldy.
Ǵ.Qurmanǵalıev atyndaǵy Batys Qazaqstan oblystyq fılarmonııasynyń ánshisi Ernar Ómirálige ekinshi oryn (500 myń teńge) buıyrdy.
«Arqa mektebiniń ánshilerimen saıysý ońaıǵa túsken joq. Degenmen tyńǵylyqty daıyndyqpen barǵannan keıin júldege iliktim. Men ózim alǵashqy kezeńde Qanapııanyń «Qanapııa», Muhıttyń «Kók aıdaı», halyq áni «Eki jıren», Ǵ.Qurmanǵalıevtiń «Asyljan», sosyn halyq áni «Baıanaýyl», Jarylǵapberdiniń «Ardaq», Muhıttyń «Úlken aıdaı», sońǵy satyda Berikbol Kópenulynyń «Aǵash aıaq», Muhıttyń «Kishi aıdaıyn» oryndap berdim», dedi QazAqparat tilshisine Ernar Ómiráli.
Aıta keteıik, Ernar Ómiráli budan buryn Muhıt Meráliuly, Ǵ.Qurmanǵalıev atyndaǵy respýblıkalyq baıqaýlardyń laýreaty atanǵan bolatyn.
