Batysqazaqstandyq ánshi respýblıkalyq baıqaýda birinshi oryndy jeńip aldy
ORAL. QazAqparat - Ǵ.Qurmanǵalıev atyndaǵy BQO fılarmonııasynyń dástúrli ánshisi Farhat Orazov Qaraǵandy qalasynda «EKSPO-2017» halyqaralyq mamandandyrylǵan kórmesi aıasynda márege jetken Qazybek bıdiń 350 jyldyǵyna arnalǵan «Ordaly sózdiń ıesi - Qazybek bı» atty jyrshylar men termeshilerdiń respýblıkalyq baıqaýynda birinshi orynǵa ıe boldy, dep habarlaıdy «QazAqparat» tilshisi.
QR Mádenıet jáne sport mınıstrligi uıymdastyrǵan óner dodasyna Almaty, Astana, Qyzylorda, Qaraǵandy, Aqtaý, Jańaózen, Aqtóbe, Qostanaı, Túrkistan, Petropavl, Oral qalalarynan barlyǵy on alty jyrshy-termeshi qatysyp, baq synady.
Farhat Orazov baıqaýdyń birinshi kezeńinde Kerderi Ábýbákirdiń nasıhat sózderin, Aqtan Kereıulynyń «Qazaqtyń salty», Mahambettiń tolǵaýyn oryndap berdi. Ekinshi kezeńde baıqaý talaby boıynsha Arqa óńiri jyraýlarynyń týyndylaryna kezek keldi. Bul joly Farhat Úmbeteı jyraýdyń «Abylaı hanǵa Bógenbaı batyrdyń ólimin estirtýi» degen tolǵaýyn, sondaı-aq dastan aıtýdan «Qarasaı-Qazıdy» qazylar alqasy men kórermender nazaryna usyndy.
Baıqaý qorytyndysynda qyzylordalyq Maıra Sársenbaeva bas júldeni enshilese, birinshi oryn F.Orazovpen birge astanalyq Baǵdáýlet Tolybekovke de berildi.
Aıta keteıik, F.Orazov ótken jyldan beri birneshe respýblıkalyq, halyqaralyq baıqaýlardyń jeńimpaz-júldegeri atanǵan bolatyn.
