Batysqazaqstandyq Anıta Nagaı Azıadanyń qola júldegeri atandy
ORAL. QazAqparat - Batysqazaqstandyq shorttrekshi Anıta Nagaı búgin Japonııanyń Sapporo qalasynda ótip jatqan VІІІ qysqy Azııa oıyndarynyń qola júldegeri atandy, dep habarlaıdy «QazAqparat» HAA tilshisi.
Anıta Qazaqstan quramasy sapynda Kım Iong A, Anastasııa Krestova, Mádına Janbosynova jáne Olga Tıhonovamen birge 3 myń metrlik qashyqtyqta estafetalyq jarys fınalynda Ońtústik Koreıa, Qytaı jáne Japonııa komandalarymen synǵa tústi. Jarys barysynda tórtinshi kele jatqan qazaqstandyqtarǵa sáttilik joldas boldy. Óıtkeni japondyq qyzdar qulap qalyp, olardy qazaqstandyqtar basyp ozdy. Osylaısha ońtústikkoreıalyqtar altynnan alqa taqsa, qytaılyqtarǵa kúmis, Qazaqstan quramasyna qola júlde buıyrdy. Al erler arasynda qazaqstandyqtar erekshe tabysqa qol jetkize qoıǵan joq. Munyń sebebi Sapporoǵa short-trekshilerdiń ekinshi quramy barǵandyǵynda deýge bolady. Negizgi quram Gollandııanyń Rotterdam qalasynda ótetin álem chempıonatyna ázirlenýde.
Sonymen, Batys Qazaqstan ınnovatsııalyq-tehnologııalyq ýnıversıtetiniń 1-kýrsynda oqıtyn Anıta Nagaı kezekti qola medalin enshilep otyr. Buǵan deıin ol ótken jyly Lıllehammerde ótken jasóspirimderdiń qysqy olımpıadasy jáne bıyl Almatydaǵy qysqy ýnıversıadanyń qola júldelerin jeńip alǵan bolatyn.
foto:Іzturǵan Aldaýev
