Batysqazaqstandyq aqyn S.Bısenǵalıevke jerlesteri «temir tulpar» mingizdi
ORAL. 18 mamyr. QazAqparat - Aqjaıyq aýdanynyń ortalyǵy Chapaev aýylynda aqyn Saǵyntaı Bısenǵalıevtyń 55 jasqa tolýyna oraı shyǵarmashylyq keshi ótti.
Kezinde respýblıkalyq aıtystarǵa qatysyp, júlde alǵan S.Bısenǵalıev birazdan beri jazba óleńderimen de kórinip keledi. Aýdan ákimi Narıman Tóreǵalıevtiń atap ótkenindeı, ómir boıy aýylda eńbek etken, óz balalary Aınabek jáne Ásetpen birge basqa da talapkerlerdi aıtys ónerine baýlyp júrgen Saǵyntaı aqynnyń eńbegi aıtarlyqtaı.
Aýdannyń úlken-kishisi kóp jınalǵan keshte jýrnalıst Tiles Jazyqbaı Saǵyntaıdyń shyǵarmashylyǵyn saralap, sholý jasady. Odan soń aqynnyń jyrlary oqylyp, áýesqoı sazgerler Ǵ.Qıbashev, J.Qýanǵalıev, A.Janaıyshevtyń ánderi shyrqaldy. Saǵyntaıdyń uly Aınabek pen Talǵat Myqı aıtysty.
Oral qalasynan keshke ádeıi barǵan jýrnalıst B.Qýatov jáne N.Іzteleýov, Á.Kereev syndy ardager aǵalar keshke salmaq berse, aqynnyń dostary, Qazaqstannyń eńbek sińirgen qaıratkeri Q.Berdiǵalıev, U.Sarıeva, Z.Sısenǵalıev, B.Qalıolla, Ú.Eleýbaeva, R.Shaqý jáne marqum dosy T.Dosymovtyń jary Qarlyǵash pen uly Abyl, aýyldyq okrýg ákimderi aqynǵa júrekjardy tilekterin jetkizip, syı-sııapattar jasady. Mán-mazmuny kelisken keshte Saǵyntaıdyń shákirtteri birinen soń biri sahnaǵa shyǵyp, óz óleńderin oqydy.
Oblystyq týrızm, dene shynyqtyrý jáne sport basqarmasynyń bastyǵy Músilim Ońdaǵanov jerles aǵasy Saǵyntaıǵa jeńil avtokólik syılady. Kesh sońynda aýdan halqy Saǵyntaı aqyndy sý jańa temir tulparǵa mingizip, qýanyshyn birge bólisti.
