Batysqazaqstandyq aqyn respýblıkalyq aıtystyń júldegeri atandy
ORAL. QazAqparat - Batysqazaqstandyq aqyn Eldar Ihsanov respýblıkalyq aıtystyń júldegeri atandy, dep habarlaıdy QazAqparat tilshisi.
Qyzylorda oblysy Qarmaqshy aýdany Josaly kentinde osy aýdannyń 90 jyldyǵy men Turymbet jyraý Salqynbaıulynyń 150 jyldyǵyna arnalǵan aıtýly dodaǵa barlyǵy 10 aqyn qatysyp, baq synady.
Áıgili jyraý Almas Almatov bastaǵan qazylar alqasynyń sheshimimen qyzylordalyq belgili aıtysker Muhtar Nııazov bas júldege tigilgen jeńil avtokólikti jeńip aldy.
Qarmaqshylyq Syrym Ádilbek birinshi (1 mln teńge), tarazdyq, qazirgi kezde Astanada oqıtyn Arýna Kerimbek ekinshi (700 myń teńge), oraldyq Eldar Ihsanov úshinshi (500 myń teńge) orynǵa ıe boldy.
«Júz jyraýdyń mekeni atanǵan Qarmaqshyda ótken aıtystyń deńgeıi joǵary boldy, myqty aqyndar qatysty. Men ózim astanalyq Nurmat Mansurovpen sóz qaǵystym», dedi QazAqparat tilshisine E.Ihsanov.
Aıta keteıik, bul - Eldardyń respýblıkalyq aıtystaǵy úshinshi júldesi. Buǵan deıin ol Astana men Aqtóbede ótken dodalarda júldegerler qatarynan kóringen bolatyn.
