Batysqazaqstandyq aqyn respýblıkalyq aıtysta birinshi oryndy ıelendi
ORAL. QazAqparat - Batysqazaqstandyq Talǵat Myqı Almaty qalasyndaǵy Ó.Joldasbekov atyndaǵy stýdentter saraıynda márege jetken «Bilimdige dúnıe jaryq» respýblıkalyq aqyndar aıtysynda birinshi oryndy ıelendi, dep habarlaıdy «QazAqparat» HAA tilshisi.
QR Bilim jáne ǵylym mınıstrliginiń qoldaýymen «Bilim-Innovatsııa» halyqaralyq qoǵamdyq qory men «Jádiger jastary» qoǵamdyq birlestigi uıymdastyrǵan dodaǵa elimiz qalalarynan jasy otyzǵa deıingi 12 aqyn qatysyp, baq synady.
Bas júldeni tarazdyq Áset Dúısebaev enshiledi.
«Halyqtyń aıtysqa yqylasy erekshe ǵoı, bul joly da stýdentter saraıy lyq toly boldy. Men Astanadan kelgen 8-synyp oqýshysy Dıas Ótepbergenmen sóz qaǵystyrdym. Aıtys sońynda: Aǵasy izgilikke bet tireıdi, Demeńder, ózeginen tepkileıdi. Qabiletin ashtym dep aıttym jańa, Osyndaı inilerdi tekti deıdi. Endi baǵyn ashaıyn bul balanyń, Buıyrsa, basyna baq kep túneıdi. Sondyqtan óz jolymdy bermekshimin, Dıasqa Talǵat aq jol bek tileıdi. Shynaıy peıilmenen berip turmyn, Aıtysty aıaqtar kez jetti deıdi, Urpaq qamyn oılaıtyn naǵyz ustaz, Ózimnen shákirt ozsyn dep tileıdi, dep jolymdy berdim», dedi «QazAqparat» tilshisine Talǵat Myqı.
Aıta keteıik, jazba óleńmen de dendep aınalysyp, kitap shyǵaryp úlgergen M.Ótemisov atyndaǵy Batys Qazaqstan memlekettik ýnıversıtetiniń túlegi Talǵat Myqı qazirgi kezde Oraldaǵy Qadyr Myrza Álı atyndaǵy mádenıet jáne óner ortalyǵynda qyzmet atqarady. Ol budan buryn da respýblıkalyq aıtystarda júlde alyp júrgenimen, birinshi orynǵa alǵash ret kóterilip otyr.
