Batysqazaqstandyq aqyn qatarynan eki aıtysta birinshi orynǵa ıe boldy
NUR-SULTAN. QazAqparat – Qyzylorda oblysy Jalaǵash aýdanynda «Tarıhy tereń, eńbegi eren – Jalaǵash» atty respýblıkalyq aqyndar aıtysy márege jetti, dep habarlaıdy QazAqparat tilshisi.
«Altyn dán – 2019» merekesi men Jalaǵash aýdanynyń 80 jyldyǵyna arnalǵan jyr dodasyna respýblıka óńirleri men qalalarynan 10 aqyn qatysyp, baq synady.
Aıtysty aqyn, Qazaqstannyń eńbek sińirgen qaıratkeri Júrsin Erman júrgizdi.
Jalaǵash aýdanynyń ákimi Qaıratbek Áýbákiruly barlyq aqyndarǵa sáttilik tiledi.
Aqyn, kompozıtor, Qazaqstannyń eńbek sińirgen qaıratkeri, Jalaǵash aýdanynyń qurmetti azamaty Elena Ábdihalyqova bastaǵan qazylar alqasynyń sheshimimen qyzylordalyq Muhtar Nııazov bas júldeni (1 mln teńge) jeńip aldy.
Batysqazaqstandyq Talǵat Myqı birinshi, taǵy bir qyzylordalyq Aıdos Rahmetov ekinshi, atyraýlyq Shalqarbaı Іzbasarov úshinshi orynǵa ıe boldy.
Jeńimpaz-júldegerler men barlyq aıtyskerlerge aýdan ákiminiń dıplomdary men qarjylaı syılyqtar tabys etildi.
Aıta keteıik, oraldyq Talǵat Myqı osymen qatarynan ekinshi aıtysta birinshi orynǵa ıe bolyp otyr.
Ótken aptada Nur-Sultan qalasynda Elbasynyń «Bolashaqqa baǵdar: rýhanı jańǵyrý» baǵdarlamasy aıasynda «Nur Otan» partııasynyń tikeleı qoldaýymen «Bereke birligińde, elim» atty respýblıkalyq aqyndar aıtysy uıymdastyrylǵan bolatyn. Munda elordalyq Erkebulan Qaınazarov bas júldeni (2 mln teńge) enshilese, Talǵatqa birinshi oryn (1,5 mln teńge) buıyrǵantuǵyn. Taǵy bir batysqazaqstandyq Jansaıa Mýsına men nursultandyq Bekzat Asqarov ekinshi (1 mln teńgeden), pavlodarlyq Aspanbek Shuǵataev pen túrkistandyq Qalıjan Bildásh úshinshi orynnan kóringen edi.
