Batysqazaqstandyq 6 týrıst velosıpedpen Astanaǵa attandy
ORAL. QazAqparat - Elordanyń 20 jyldyǵyna oraı batysqazaqstandyq alty velotýrıst Astanaǵa attandy, dep habarlaıdy QazAqparat tilshisi.
BQO balalar men jasóspirimder týrızmi jáne ekologııa ortalyǵynyń dırektory, pedagogıka ǵylymdarynyń kandıdaty Vıktor Fomınniń aıtýynsha, olar Astanaǵa deıingi 2 myń shaqyrym joldy 20 kúnde júrip ótpek.
Mundaı velojoryq Batys Qazaqstan tarıhynda tuńǵysh ret uıymdastyrylyp otyr. Sapar maqsaty - Astananyń 20 jyldyǵy aıasynda velotýrızmdi nasıhattaý, qalyń buqaranyń sportpen aınalysýyna septesý.
Joryqshylardyń úsheýi - oblystyq balalar men jasóspirimder týrızmi jáne ekologııa ortalyǵynyń qyzmetkerleri bolsa, qalǵandary - Aqjaıyq, Bórli, Syrym aýdandarynyń qosymsha bilim berý pedagogtary. Olardyń bári de jastar deýge bolady, bireýi - áıel adam.
«Velosıpedshilerimiz mundaı uzaq qashyqtyqqa shyǵý úshin aldyn ala daıyndaldy. Kún saıyn 100 shaqyrymdy artqa tastaý ońaı emes. Olar aýdan-aýyldardy aıtpaǵanda, Aqtóbe-Tobyl-Qostanaı-Esil qalalary arqyly júrip ótip, Astanaǵa 3 tamyzda jetpekshi. Ár qalada aıaldap, týrızm ortalyqtary men tarıhı oryndarda bolyp, jergilikti týrıstermen tájirıbe de almasady», - dedi QazAqparat tilshisine Vıktor Fomın.
