Batys Saharadaǵy BUU mıssııasyn atqaryp júrgen qazaqstandyq ofıtserler quramy jańardy

NUR-SULTAN. QazAqparat - Birikken Ulttar Uıymynyń Batys Saharada referendým ótkizý jónindegi mıssııasyn atqaryp júrgen qazaqstandyq ofıtserler almasty. Jańa quramda úsh ofıtser – podpolkovnıkter Ýálıhan Baıkenov pen Sábına Murzalınova, sondaı-aq kapıtan Dáýren Sadýaqasov bar, dep habarlaıdy QR QM baspasóz qyzmeti.

Olar bir jyl bitimgerlik mıssııany oryndaǵan podpolkovnık Arman Omarov jáne Ernar Amanııazovpen, sondaı-aq kapıtan Rımma Shákeevanyń ornyna bardy.

Atalǵan mıssııaǵa daıyndyq kezinde ofıtserler onyń erekshelikteri men mindetterin, sondaı-aq tutastaı sol eldegi jaǵdaıdy bir aıdan astam ýaqyt zerdeledi. Endi olar 30-dan astam memlekettiń ókilderimen birge qyzmet etpek.

Bitimgerlikten qaıtqan ofıtserler ózderin jaýapty jáne joǵary bilikti mamandar retinde kórsetti. Atap aıtqanda, podpolkovnık Arman Omarov ushý qaýipsizdigi tehnıkasy men olardy úılestirýge jaýapty boldy. Daǵdarys jaǵdaıynda kórsetken bastamasy men kásibıligi úshin ofıtser mıssııa qolbasshysynyń atynan alǵys hatpen marapattaldy.

Podpolkovnık Ernar Amanııazov sońǵy jeti aı ishinde mıssııa qolbasshysynyń logıstıka jónindegi aǵa áskerı keńesshisi mindetin atqardy. Ol materıaldyq-tehnıkalyq qamtamasyz etýdi josparlaýǵa birneshe ret qatysty. Qıyn jaǵdaılar týyndaǵanda óz usynystaryn aıtyp, nátıjesinde komanda olardy negizdi, ári durys usynys dep qabyldady.

Kapıtan Rımma Shákeeva áskerı qyzmetshi áıelderdiń bitimgerlik qyzmetiniń barlyq salalarynda, qıyn jaǵdaılarda ózderiniń er áriptesterimen birdeı deńgeıde qyzmet atqara alatynyn kezekti ret dáleldedi. Ol mıssııadaǵy qyzmetin bitimgerlik bazasynyń operatory retinde bastady. Patrýlderdi josparlaýǵa jaýapty boldy. Sodan keıin mıssııa shtaby janyndaǵy bólimde jumys istedi, onda kelgen ofıtser-bitimgerlerdi daıarlaýda kásibı dárejesin kórsetti.

Qazirgi sátte Batys Saharada Qazaqstan Qarýly Kúshteriniń áskerı baqylaýshylary qyzmetinde qazaqstandyq bes ofıtser bar. Bitimgerlik operatsııalarǵa olar qarýsyz qatysady jáne qaqtyǵysýshy taraptardyń eshqaısysyn qoldamaı, beıtarap qaǵıdany ustanady.