«Batys» óńirlik qolbasshysy Aqtóbede erlikpen qaza tapqan Berikjan Qalıevtiń anasymen kezdesti

ORAL. QazAqparat - QR Ulttyq ulany «Batys» óńirlik qolbasshysy, general-maıor Qaırat Aqtanov Aqtóbedegi lańkestik oqıǵa kezinde erlikpen qaza tapqan kishi serjant, osyǵan oraı úshinshi dárejeli «Aıbyn» ordenimen marapattalǵan Berikjan Qalıevtiń anasy Gúljan Erenovamen kezdesip, oǵan qurmet kórsetti, dep habarlaıdy QazAqparat tilshisi.

«Batys» óńirlik qolbasshylyǵynyń baspasóz qyzmetinen túsken málimetke qaraǵanda, Qaırat Aqtanov osyndaı erjúrek uldy tárbıelegeni úshin shynaıy alǵysyn bildirip, onyń otbasyna aldaǵy ýaqytta da qoldaý-kómek kórsetiletinin jetkizdi.

«Sol oqıǵadan keıin júregim qanjylap, kóz jasym tyıylar emes. Dúnıede anaǵa baladan aıyrylǵannan aýyr qasiret joq. Ulym áskerı qyzmette sondaı adal bolsa, bylaıǵy ómirde de sondaı jan edi. Bolashaqta mundaı qaıǵynyń bolmaýyn, analardyń jylamaýyn tileımin», dedi Gúljan Tóleıqyzy.

 

Kezdesý sońynda Q.Aqtanov Berikjan Qalıevtiń anasyna baǵaly syılyq tartý etti. 

Aıta keteıik, bıylǵy 5 maýsymda Aqtóbedegi lańkestik shabýyl kezinde qanypezerlerge qaımyqpaı qarsy turǵan úsh áskerı qyzmetker, atap aıtqanda, QR UQK  áskerı qarsy barlaý qyzmetiniń aǵa jedel ýákili, maıor Danıel Maılybaev, «Batys» óńirlik qolbasshylyǵyna qarasty 6655-áskerı bóliminde kelisimshart boıynsha qyzmet etken kishi serjant Berikjan Qalıev jáne qatardaǵy jaýynger Dosbol Sapar qaza tapqan-dy.

Táýelsizdiktiń 25 jyldyǵyna oraı 6655-áskerı bólimniń qatardaǵy jaýyngeri Baqtııar Qaıyrbekov, qaıtys bolǵannan keıin Berikjan Qalıev pen Dosbol Sapar úshinshi dárejeli «Aıbyn» ordenimen, sondaı-aq qatardaǵy jaýyngerler Syrym Súndetov, Denıs Chernyshov «Jaýyngerlik erligi úshin» medalimen marapattalǵan edi. B.Qalıevtiń ordeni jýyrda elordada anasyna tabys etilgen bolatyn.