Batys óńirlik qolbasshylyǵynyń jeke quramy KVI-ge qarsy vaktsına saldyrdy
ATYRAÝ. QazAqparat – «Batys» óńirlik qolbasshylyǵynyń jeke quramy koronavırýsqa qarsy vaktsına saldyrdy, dep habarlaıdy QazAqparat.
«Batys» óńirlik qolbasshylyǵy baspasóz qyzmetiniń málimetinshe, Aqtaý, Aqtóbe jáne Atyraý garnızondarynyń áskerı bólimderinde jyljymaly vaktsınalaý beketteri uıymdastyrylǵan. Áskerılerdi vaktsınalaý erikti túrde júrgizilgen.
«Áskerı qyzmetshilerge Qazaqstanda óndirilgen «Sputnik V» jáne «QazVac» vaktsınalary salynady. Barlyq sanattaǵy áskerı qyzmetshilerdi, ásirese, jańadan shaqyrylǵan sarbazdardy qosa eseptegende, jeke quramnyń shamamen 90% vaktsına aldy. Olardyń eshqaısysynda vaktsınanyń keri áseri baıqalmady. Áskerı qyzmetshilerdiń densaýlyq jaǵdaıy jaqsy, - deıdi «Batys» óńirlik qolbasshylyǵy medıtsınalyq qyzmetiniń bastyǵy, medıtsınalyq qyzmettiń maıory Naǵyshan Orazymbetov.
Onyń aıtýynsha, Otan qorǵaýshylar kúnine «Batys» óńirlik qolbasshylyǵynyń áskerı bólimderi vaktsınanyń birinshi komponentin saldyrýdy aıaqtaýdy josparlap otyr.
Eske sala ketelik, buǵan deıin Atyraýdaǵy áskerı garnızonǵa 100 sarbaz kelgenin jazǵan edik.
