«Batys» óńirlik qolbasshylyǵy maıdangerlerge qurmet kórsetti
ORAL. QazAqparat - QR Ulttyq ulany «Batys» óńirlik qolbasshylyǵy men 5517-áskerı bóliminiń qyzmetkerleri osy qolbasshylyqtaǵy ardagerler uıymymen birge qaıyrymdylyq aıasynda Oral qalasynda turatyn maıdangerler, doǵarystaǵy polkovnıkter Semen Danılın, Pavel Býkatkın jáne doǵarystaǵy kapıtan Ekaterına Krylovanyń úıinde bolyp, qurmet kórsetti.
«Batys» óńirlik qolbasshylyǵy baspasóz qyzmetiniń jetekshisi, podpolkovnık Erbolat Sultanovtyń habarlaǵanyndaı, ár maıdangerge Uly Jeńistiń 70 jyldyǵyna arnalǵan «Biz Jeńistiń muragerlerimiz» atty kitap, azyq-túlik qorjyny jáne materıaldyq járdem berildi.
«Batys» óńirlik qolbasshylyǵy ardagerler keńesiniń tóraǵasy Aleksandr Fomýshkınniń atap ótkenindeı, aǵa býynnyń erligin keıingi urpaq eshqashan da umytpaıdy. Qazaqstanda Elbasy tapsyrmasyna sáıkes halyqtyń áleýmettik jaǵynan az qamtylǵan bóligine, sonyń ishinde maıdangerler men múgedekterge, zeınetkerlerge udaıy kómek kórsetilýde.
«Bizdiń qolbasshylyq boıynsha Batys Qazaqstan oblysynda soǵysqa qatysqan úsh maıdangerimiz ǵana qaldy. Olar 5517-áskerı bólimindegi medpýnkt dárigerleriniń jiti baqylaýynda. Biz ardagerlerimizdi nazardan tys qaldyrmaı, árdaıym jaǵdaılaryn bilip, qarasyp otyramyz», dedi «Batys» óńirlik qolbasshylyǵy tárbıe jáne áleýmettik-quqyqtyq jumystar basqarmasynyń bastyǵy, podpolkovnık Álisher Ábdirasyl.
Jastary ulǵaıǵandyǵyna qaramastan, maıdangerler qoǵamdyq-saıası ómirge, jastar tárbıesine belsene aralasady. Mysaly, 102 jasqa tolyp otyrǵan Semen Akımovıch Danılın áli de tyń, eldegi bolyp jatqan jańalyqtarǵa qulaǵyn túrip otyrady. Ol osy joly da qonaqtaryna maıdan joldary týraly áńgimelep berdi. «Biz, mine, beıbit ómir súrýdemiz. Elimiz táýelsizdiktiń 25 jyldyǵyn toılaǵaly otyr. Osynyń bári - ata-babalarymyz ben bizdiń tustastarymyzdyń erligi jáne eńbegimen kelgen beıbitshilik pen tynyshtyqtyń, Elbasymyz Nursultan Nazarbaev júrgizip otyrǵan sarabdal saıasattyń arqasy», dedi S.Danılın sóziniń sońynda.
Aıta keteıik, osyndaı sharalar «Batys» óńirlik qolbasshylyǵyna qarasty Qazaqstannyń batys aımaǵyndaǵy barlyq áskerı bólimderde uıymdastyryldy.
