Batys óńirlerde ishki joldardyń sapasy tómen – Beıbit Atamqulov
NUR-SULTAN. QazAqparat – Batys Qazaqstan, Atyraý jáne Aqtóbe oblystarynda jergilikti mańyzdaǵy joldardyń sapasy tómen. Bul týraly Indýstrııa jáne ınfraqurylymdyq damý mınıstri Beıbit Atamqulov Úkimet otyrysynda aıtty, dep habarlaıdy QazAqparat tilshisi.
«Jergilikti joldar uzyndyǵy 71 myń shaqyrymdy quraıdy. Atqarylǵan jumystar esebinen ótken jyldary jergilikti joldardyń 75 paıyzy (53 myń shaqyrym) normatıvtik jaǵdaıǵa keltirildi. Búginde óńirler arasyndaǵy oblystyq jáne aýdandyq joldardyń jaǵdaıy ártúrli. Máselen, eń tómen kórsetkishter - Batys Qazaqstan, Atyraý jáne Aqtóbe oblystarynda», - dedi mınıstr.
Vedomostvo basshysy Mańǵystaý, Jambyl, Pavlodar, Shyǵys Qazaqstan, Almaty, Qaraǵandy, Túrkistan oblystarynda joldardy jaqsartýǵa qarjy bólý kezinde tepe-teńdik qaǵıdaty saqtalmaıtynyn atap ótti.
«Bıyl jergilikti joldar jelisin damytýǵa – 119 mlrd teńge qarastyrylǵan. Onyń ishinde respýblıkalyq bıýdjetten – 52 mlrd teńge, jergilikit bıýdjetterden - 67 mlrd teńge.Bólingen qarajat esebinen jol jóndeý jumystarynyń barlyq túrimen 1,3 myń shaqyrym jol qamtylady. 150 shaqyrym jańadan salynsa, 1 150 shaqyrym jol kúrdeli jóndeýden ótedi», - dedi Beıbit Atamqulov.
Eske salsaq, Úkimet otyrysynda Indýstrııa jáne ınfraqurylymdyq damý mınıstri Beıbit Atamqulov jergilikti ákimdikterdi jol boıynda kórsetiletin qyzmet sapasyn arttyrýǵa shaqyrǵan bolatyn.
Sondaı-aq, vedomstvo basshysy eldegi aqyly joldardan qansha qarajat túsetinin baıandady.
