Batys óńiriniń elektr jelilerin kúsheıtý jumystary bastalady – Nurlan Noǵaev

NUR-SULTAN. QazAqparat – Respýblıkanyń batys óńiriniń elektr jelilerin kúsheıtý jumystary bastalady. Bul týraly Úkimet otyrysynda QR Energetıka mınıstri Nurlan Noǵaev aıtty, dep habarlaıdy QazAqparat tilshisi.

«Elimizdiń ońtústik óńirindegi elektr jelilerin kúsheıtýge qatysty usynystardy qalyptastyrý jónindegi jumys toby quryldy. Jelilerdi kúsheıtýdiń negizdelgen tásilin ázirleý úshin «Samuryq-Qazyna UÁQ» AQ-men birlesip táýelsiz ǵylymı ınstıtýt tartylatyn bolady», - dedi Nurlan Noǵaev.

Onyń aıtýynsha, Batys óńirdiń elektr jelilerin kúsheıtý aıasynda 2021 jyly Teńiz – Qulsary – Atyraý – Inder – Oral baǵyty boıynsha 220 kV elektr jelilerin kúsheıtý jumystary bastalady.

«Atalǵan jobalar men jańa qýattardy ońtaıly ornalastyrý úshin uzaq merzimdi josparlaýdy qamtamasyz etetin 2035 jylǵa deıingi energetıkalyq teńgerim ázirlenedi. Teńgerimdi ázirleý kezinde batys óńiriniń elektr jelilerin Birtutas elektr energetıkasy júıesimen biriktirýdiń utymdy nusqasy aıqyndalatyn bolady. Bul jumystar 2021 jyldyń jeltoqsanynda bitedi», - dedi mınıstr.