«Batys Marka Lamb» JShS ónimi eksportqa jóneltile bastamaq (FOTO)
Kásiporyn dırektory Baqytjan Keskinbaevtyń aıtýynsha, qazirgi kezde Ózbekstanǵa aı saıyn 100-150 tonna qoı etin jóneltýge uzaq merzimdi kelisimshart jasalǵan. Negizinen halyqaralyq naryqqa, ıaǵnı óniminiń 80 paıyzyn shetelge ótkizýge baǵyt ustaǵan «Batys Marka Lamb» JShS Reseıdiń Máskeý men Sankt-Peterbor qalalaryna qoı etin eksporttaýǵa daıyn. Buǵan deıin qazaqstandyq qoı etine Reseı tarapynan tyıym salynǵany qolbaılaý bolǵan edi. Endi ol alynyp tastalǵannan keıin bul másele úkimetaralyq deńgeıde sheshilmekshi.
Qazirgi tańda 5 gektar aýmaqty alyp jatqan óndiristik keshende bári de tolyǵymen avtomattandyrylǵan. Italıandyq «Rovani SrL» mal soıý jáne et óńdeý jelisinde qoı soıýdan bastap et óńdeýge deıingi joǵary tehnologııalyq talaptar saqtalady. Daıyn ónim tapsyrys berýshige tońazytylǵan tóshke nemese jiliktelip, qorapqa salynǵan kúıinde jetkiziledi. Búginde muzdatylǵan, ıaǵnı ábden qatyrylǵan etten góri tońazytylǵan etke suranys joǵary. Óıtkeni mundaı et óziniń paıdaly qasıetteri men dárýmenderin joımaıdy. Osyndaı artyqshylyqtaryna bola sheteldikter qyzyǵýshylyǵyn tanytyp otyr.
Kásiporyn bıylǵy naýryzda paıdalanýǵa berilgennen keıin bastapqyda kúnine 30 bas soıylsa, birtindep táýligine 500 bas qoı etin óńdeıtin deńgeıge qol jetkizildi. Jyl aıaǵyna deıin óndiris qýatyn 700 basqa jetkizý kózdelýde. Óndiristik jeliniń iske qosylýy 80 jergilikti turǵyndy oqytyp, jumysqa ornalastyrýǵa múmkindik berdi. Tolyq qýatyna kóship, reseılikterge et jóneltýdi bastaǵannan keıin qyzmetkerler sany 150-ge jetpek. Osyǵan deıin Batys Marka Lamb» 4,4 tonna ónimin Almaty, Taraz, Atyraý, Aqtóbe qalalaryna ótkizip úlgerdi. Degenmen ettiń ózindik qunyn jáne onyń eldegi baǵasyn eskergende, ony shetke shyǵarǵan áldeqaıda tıimdi.
«QazAgroQarjy» AQ BQO fılıalynyń dırektory Tólebaı Meńdiorazovtyń sózine qaraǵanda, atalmysh joba memleket tarapynan qoldaý taýyp otyr. Jobanyń jalpy quny 2,8 mlrd. teńge bolsa, «QazAgroQarjy» AQ qazirgi zamanǵy qural-jabdyq alýǵa 1,5 mlrd. teńge bólse, qalǵanyn ınvestordyń ózi qarjylandyrdy.
Keshenniń Oral-Atyraý avtojoly boıynda jáne oblystaǵy qoı malyn ósirýmen aınalysatyn aýdandarǵa jaqyn ornalasýy qolaıly bolyp otyr. Sonyń biri - Jańaqala aýdany. Kásiporyn osy aýdandaǵy aty alysqa ketken «Birlik» asyl tuqymdy mal zaýyty» JShS-men ózara tıimdi baılanys ornatqan. «Birlikte» 12500 bas qoı bolsa, osy sharýashylyqtan qazirdiń ózinde 1600 bas marqa keshenge tapsyrylǵan. Jyl saıyn 3500-4000 basqa deıin jetkizý oılastyrylýda. Seriktestik dırektory Qanat Eshimovtiń málimdegenindeı, bul sharýashylyq úshin de paıdaly. Buryn elimizdiń basqa óńirlerine tasymaldap, shyǵynǵa ushyrasa, endi irgedegi keshenge ákeledi ári munda qoı etiniń ár kelisine memleket tarapynan 100 teńgeden demeýqarjy tólenedi. Aldaǵy ýaqytta kásiporyn oblystyń basqa da aýdandarymen, kórshiles óńirlermen osyndaı qarym-qatynas ornatpaqshy.
Aıta keteıik, «Batys Marka Lamb» JShS et óńdeý kesheni «QazAgro» ulttyq basqarýshy holdıngi» AQ respýblıkanyń agroónerkásip kesheninde júzege asyryp jatqan jalpy quny 325,1 mlrd. teńgeni quraıtyn 529 ınvestıtsııalyq jobanyń biri bolyp tabylady. Kúni búginge deıin elimizde jalpy quny 234,5 mlrd. teńgege 418 joba iske qosylyp, 12,8 myń jumys orny ashylǵan. Sonyń ishinde bıyl 13,5 mlrd. teńgeniń 56 ınvestıtsııalyq jobasy paıdalanýǵa berildi.
