«Batys Qytaı - Batys Eýropa» kólik dálizinde SsangYong jalpaqtabandy kólikteriniń avtojarysy ótýde
ALMATY. Qyrkúıektiń 28-i. QazAqparat /Erbol Turymbetov/ - Keshe «Batys Qytaı - Batys Eýropa» tranzıt dáliziniń qazaqstandyq bóligi arqyly Qazaqstanda qurastyrylǵan SsangYong jalpaqtabandy kólikteriniń avtojarysy bastaldy, dep habarlaıdy QazAqparat.
Ony «Jasyl el» ekologııalyq jastar qozǵalysy AllurAuto avtokólik kompanııasy tobymen birlese uıymdastyryp otyr. Jarystyń maqsaty kúre jol boıynda ornalasqan eldi-mekender turǵyndary men jastarǵa halyqaralyq kólik dálizi paıdalanýǵa berilgennen keıin shaǵyn jáne orta bıznesti damytý men jumysqa ornalasý múmkindikteri ashylǵandyǵyn nasıhattaý. Sonymen birge, Qostanaıdaǵy «Agromashholdıng Qazaqstan» AQ-da qurastyrylatyn SsangYong jalpaqtabandy kóligin synaqtan ótkizýdi kózdeıdi.
SsangYong kóliginiń 5 túri qatysatyn avtojarys QHR-nyń shekarasynan bastalyp, Qazaqstannyń ońtústik jáne ortalyq aımaqtary arqyly Astanaǵa baryp aıaqtalady. Joldyń jalpy uzyndyǵy - 3 myń shaqyrym. Keshe Qorǵas qalasynda start berilgen jarys qatysýshylary búgin Almatyǵa jetti.
«Jastardyń «Jasyl el» ekoqozǵalysy ókilderimen ótkizip otyrǵan bul jarys «Batys Qytaı - Batys Eýropa» joly boıyndaǵy aımaqtardy damytýdy kózdeıdi. Sonymen qatar, SsangYong kólikterin is júzinde synap kóremiz», deıdi AllurAuto avtokólik kompanııasynyń bas dırektory Andreı Lavrentev.
Sharaǵa qatysýshylar Almatydan soń Taraz, Shymkent jáne Qyzylorda qalalaryna jol tartady. Sonymen birge, jolaı eldi-mekenderde de turǵyndarmen kezdesedi.
«Halyqaralyq kólik dálizi bizdiń elimizde avtomobıl bıznesiniń qarqyndy damýyna jol ashady dep úmittenemiz. Otandyq avtobıznes kompanııalary halyqaralyq kúre jol boıynda qazirgi zamanǵy kólik-servıs ınfraqurylymyn qurýdy josparlap otyr. Qazir olardyń kóbi bul synaqqa daıyn», deıdi qazaqstandyq avtokólik bıznesi qaýymdastyǵynyń prezıdenti Arsenıı Sıdorov.
Avtosherýshiler jarys jolyn Elordada qazannyń 5-i kúni aıaqtaǵaly otyr.
