Batys Qazaqstannyń shalǵaı aýylynda meshit ashyldy
ORAL. 24 shilde. QazAqparat - Oblys ortalyǵynan eń shalǵaı ornalasqan Bókeı ordasy aýdanynyń Bısen aýylynda kúrdeli jóndeýden keıin meshit qaıta ashyldy.
Atalmysh aýyldyq okrýgtiń ákimi Qaıyrsapa Samatovtyń aıtýynsha, irgetasy 1957 jyly qalanǵan, keńes dáýirinde naýbaıhana, keıin qosalqy elektr stansasy bolǵan ǵımarat 2003 jyly ǵıbadat ornyna aınalǵan bolatyn.
Atalǵan meshit oraldyq Haırolla Ysmaǵulov pen jergilikti kásipker Ermek Meńdeshevtiń demeýshiligimen kúrdeli jóndeýden ótti. Ǵımaratty qalpyna keltirýge bısendik sheber Esbolat Muhambetov te úles qosty. Alys aýyldaǵy ımandylyq oshaǵy 1882 jyly dúnıege kelip, Naryn óńirinde meshit ustap, balalardyń saýatyn ashqan Mustaǵalı moldanyń qurmetine ashyldy.
