Batys Qazaqstannyń ismerleri jańajyldyq jármeńke uıymdastyrdy
ORAL. QazAqparat - Oralda ismerlerdiń, sýretshiler, dızaınerler men zergerlerdiń jańajyldyq jármeńkesi ótti, dep habarlaıdy «QazAqparat» HAA tilshisi.
«Alem Plaza» saýda ortalyǵynda Sharany uıymdastyrǵan «Hozıaıka mednoı gory» klýbynyń jetekshisi Nurgúl Jamalovanyń aıtýynsha, elýden astam ismer belsene qatysqan mundaı jármeńke qalada alǵash ret uıymdastyryldy. Oǵan talantty sýretshilerdiń, dızaınerler men zergerlerdiń tańdaýly týyndylary qoıyldy. Munda jumsaq oıynshyqtan bastap bısermen tigilgen, jipten toqylǵan, sondaı-aq teriden jasalǵan túrli buıymdardy kórýge bolady.
Jármeńkege sondaı-aq «Ardager» qalalyq ardagerler klýby, balalar shyǵarmashylyq ujymdary qatysyp, óz ónerlerin kórsetti. Buıymdardy satyp alýshylar az bolǵan joq. Sonymen qatar ismerler bas qosyp, tájirıbe almasty, aldaǵy oı-josparlarymen bólisti.
Bolashaqta mundaı jármeńke dástúrge aınalmaq.
