Batys Qazaqstannan Olımpıadaǵa eki sportshy qatysady
ORAL. QazAqparat - Búgin Oral qalasynda olımpıadashylardy qoldaý maqsatynda memlekettik mekemeler qyzmetkerleri arasynda densaýlyq kúni ótkizildi, dep habarlaıdy «QazAqparat» tilshisi.
Oblys ákimi Altaı Kólginov qatysqan shara barysynda qala basshysy Murat Muqaevtyń atap ótkenindeı, Ońtústik Koreıanyń Phenchhan qalasynda 9 aqpan kúni bastalatyn qysqy Olımpıada oıyndaryna Oraldan short-trek sheberleri, álem kýbogy kezeńderiniń jeńimpazdary Abzal Ájiǵalıev pen Nurbergen Jumaǵazıev qatysady. Oǵan qosa Abzaldyń Olımpıadanyń ashylý saltanatynda elimizdiń kók baıraǵyn alyp shyǵatyny belgili. Batysqazaqstandyqtar tek shorttrekshiler ǵana emes, dúnıejúzilik dodaǵa qatysatyn barsha qazaqstandyq sportshylardy qoldaıdy.
Shaǵyn fýtbol, voleıbol, hokkeı jáne shańǵy jarysynan ótken shara qorytyndysynda jeńimpaz, júldegerler marapattaldy.
Eske sala keteıik, N.Jumaǵazıev pen A.Ájiǵalıev 500 metrlik qashyqtyqta synǵa túsedi. Nurbergen sondaı-aq 1000 jáne 1500 metr qashyqtyqta jarys jolyna shyǵady. Oǵan qosa olar Qazaqstan quramasy sapynda 5 myń metrlik estafetada komandanyń neǵurlym bıikten kórinýi úshin baryn salady. Sochı Olımpıadasynda Qazaqstan erler quramasynyń osy estafetalyq jarysta besinshi orynǵa ıe bolǵany belgili.
Qazaqstandyqtar osy sport túrinen de júlde kútip otyr.
Short-trekten Qazaqstan quramasynyń bas bapkeri Mádiǵalı Qarsybekovke habarlasqanymyzda, ol báriniń de oıdaǵydaı ekendigin, osyǵan deıin Japonııada jattyqqan sportshylardyń búgin Seýlge jetetindigin bildirdi.
