Batys Qazaqstannan Maqtaaralǵa 12 tonna gýmanıtarlyq júk jóneltildi

ORAL. QazAqparat – Túrkistan oblysy Maqtaaral aýdanynda sý tasqynynan zardap shekkenderge jalpy salmaǵy 12 tonna gýmanıtarlyq júk jóneltildi, dep habarlaıdy QazAqparat tilshisi.

BQO Qazaqstan halqy assambleıasy málim etkendeı, júk kóligi Oral qalasyndaǵy Dostyq úıiniń ǵımaraty aldynan jolǵa shyqty.

Batys Qazaqstan etnomádenı birlestikteriniń ókilderi, oblys kásipkerleri men BQO QHA eriktileri azyq-túlik, qurylys materıaldary, kıim-keshek, kúndelikti jáne basqa qajetti taýarlardy jınap berdi.

Sonyń ishinde armıan, tatar, uıǵyr, ázirbaıjan, «Vaınah» sheshen-ıngýsh etnomádenı ortalyqtary, sondaı-aq «BIRLIK» eriktiler toby, «Dostyq» qazaq-vaınah klýby, «UralskRunners» áýesqoı júgirýshiler klýby, «Patriot» sport klýby, «Qadyrǵalıev T.A.» jeke kásipkerligi súbeli úles qosty.

«Batys Qazaqstan oblysy Qazaqstan halqy assambleıasynan Maqtaaral turǵyndaryna gýmanıtarlyq kómek» degen sózder jazylǵan bannerde QHA men Oral qalasynyń logotıpi de bar.

«Assambleıa músheleri, etnomádenı birlestikter, jeke kásipkerler osylaısha Maqtaaralǵa qolushyn sozdyq. Kezinde Batys Qazaqstan oblysynda da sý tasqyny bolǵan kezde barsha el kómektesip edi. Endi mundaı apat bolmasa eken. Biz qıyn shaqta da birgemiz. Qaı kezde de birligimizdi tý etip, qaıyrymdylyq, meıirimdilikti umytpaýǵa tıistimiz. Osyndaı isti keıingi jas urpaq ta jalǵastyrady dep senemiz», dedi «Vaınah» sheshen-ıngýsh etnomádenı birlestiginiń tóraǵasy, BQO QHA tóraǵasynyń orynbasary Danılbek Saratov.

Foto: Rafhat Halelov