Batys Qazaqstannan Iranǵa 1700 tonna et eksporttalady

ASTANA. QazAqparat - Batys Qazaqstan oblysy aǵymdaǵy jyldyń sońyna deıin Iran eline 1700 tonna et eksporttamaq. Bul týraly búgin Ortalyq kommýnıkatsııalar qyzmetindegi brıfıngte atalǵan óńirdiń ákimi Altaı Kólginov aıtty, dep habarlaıdy QazAqparat.

«Elbasymyz aýyl sharýashylyǵy ekonomıkanyń jańa draıveri bolýy kerek dep atap ótti. Biz Aýyl sharýashylyǵy mınıstrligimen tyǵyz jumys jasaýdamyz. Ótken jáne bıylǵy jyldary egis ónimderiniń joǵary kórsetkishteri tirkeldi. Bıyl ónim kórsetkishi 15 paıyzǵa kóp. Mal basy 10 paıyzǵa ósip otyr», - dedi ol.

Osy rette Altaı Kólginov Elbasynyń byltyrǵy Iranǵa sapary Batys Qazaqstan oblysynyń ekonomıkasy úshin jaqsy múmkindikter ashqanyn basa aıtty.

«Elimizde et eksportyna erekshe kóńil bólinip otyrǵany belgili. Osy oraıda óńirimizdiń aldyńǵy qatarly kásiporyndarynyń biri - «BatysMarqaLamb» Iran eline turaqty túrde et eksporttaýda. Bıylǵy jyldyń sońyna deıin  1500 tonna et jetkizý josparlanǵan. Qazirgi tańda áýe reısteri arqyly apta saıyn qarqyndy túrde tasymaldanýda. Sonymen qatar «Kýbleı» kásiporny jyldyń sońyna deıin kelisimshartqa sáıkes 200 tonna muzdatylǵan qoı etin Iranǵa eksporttaýda»,-  dedi óńir basshysy.