Batys Qazaqstannan EKSPO-ny tamashalaýǵa 6,5 myń oqýshy barady

ORAL. QazAqparat - Batys Qazaqstan oblysynan 6,5 myńdaı oqýshy EKSPO-2017 halyqaralyq kórmesine barady. Bul týraly búgin Ortalyq kommýnıkatsııalar qyzmetiniń óńirlik fılıalynda oblystyq bilim basqarmasynyń basshysy Aıgúl Myńbaeva málim etti, dep habarlaıdy «QazAqparat» tilshisi.

Onyń aıtýynsha, aldyn ala málimetter boıynsha bıyl mektep oqýshylarynyń 92,2 paıyzy (2016 jyly - 91,4) jazǵy demalyspen qamtylmaqshy. Statsıonarlyq lagerler sany (19) burynǵysha qalsa, oǵan qosa mektep janynda 531 lager jáne tamaqsyz 228 alańqaı uıymdastyrylmaq. Shatyrly lagerler sany 22-den 29-ǵa jetpekshi. 4,5 myńnan astam shákirt oblys pen respýblıka boıynsha ekspedıtsııalar men týrıstik saıahattarǵa shyqpaqshy.

Aıta keteıik, bıyl UBT eki kezeńge bólinip otyr. Birinshi kezeń - qorytyndy attestattaý. Mektep bitirýshilerge arnalǵan bul memlekettik emtıhan tıisti bilim berý deńgeıiniń memlekettik jalpyǵa mindetti standartynda kózdelgen oqý pánderiniń kólemin, olardyń meńgerý dárejesin aıqyndaý maqsatynda júrgiziledi. Ekinshi kezeń - Ulttyq biryńǵaı testileý, ıaǵnı joǵary oqý oryndaryna túsý emtıhany. UBT oblys boıynsha Aqjaıyq, Bórli, Jańaqala, Jánibek, Qaztalov, Qaratóbe, Syrym aýdandary ortalyǵynda jáne M.Ótemisov atyndaǵy Batys Qazaqstan memlekettik ýnıversıteti men Jáńgir han atyndaǵy Batys Qazaqstan agrarlyq-tehnıkalyq ýnıvesıtetinde ornalasqan 9 testileý pýnktinde ótedi.

Bıyl mektepterdi 4206 túlek bitirgeli otyrsa, sonyń 3 229-y nemese 76,77 paıyzy  testileýge qatysady.