Batys Qazaqstannan Aqtóbege jylqy qýyp ketken barymtashylar ustaldy

ORAL. QazAqparat -  13 qarasha kúni belgisiz bireýler Shyńǵyrlaý aýdany aýmaǵynan 22 jylqyny aıdap ketken, dep habarlaıdy «QazAqparat» tilshisi.

BQO ІІD jergilikti polıtsııa qyzmetinen túsken málimetke qaraǵanda, tańerteń sharýa qojalyǵynyń basshysy uıaly telefonynyń kómegimen jylqynyń birine bekitilgen GPS - trekkerden túsken belgige qarap úıirdiń kórshiles Aqtóbe oblysy aýmaǵynda ekendigin shamalaıdy. Sol boıda ýchaskelik polıtsııa ınspektorlaryna jáne aýdandyq ishki ister bólimine habar beredi. Іzdestirý sharalary barysynda jylqy úıiri Aqtóbe oblysy Qobda aýdany Pobeda aýyly mańynan tabyldy. Ýchaskelik ınspektorlardyń jedel is-áreketi nátıjesinde qashyp ketpek bolǵan qos barymtashy (ekeýi de Aqtóbe oblysynyń azamattary) ustaldy.

 

Qazirgi kezde olar QR Qylmystyq is júrgizý kodeksiniń 128-babyna sáıkes qamalyp, tergeý amaldary júrgizilýde. Kúdiktilerdiń jaýaptaryna qaraǵanda, Aqtóbe oblysynyń taǵy birneshe turǵynynyń osy qylmysqa qatysy bar ekeni anyqtaldy.

 

Aıta keteıik, óńirde bıylǵy on aıda tirkelgen mal urlyǵy 27,9 paıyzǵa (484-ten 349-ǵa) qysqardy. Jyl basynan beri 1774 mal urlanyp, sonyń 1302-si nemese 73,3 paıyzy ıelerine qaıtaryldy.